مەملەكەت باسشىسى قاسىم-جومارت توقايەۆ "تازارۋ كۇنىنە" وراي قازاقستاندىقتارعا ۇندەۋ جاساپ، ەل اۋماعىندا "تازا قازاقستان" جالپىۇلتتىق جوباسىنىڭ جاڭا كەزەڭى باستالعانىن مالىمدەدى، دەپ حابارلايدى Dalanews.kz.
"بۇل – ناۋرىزناما ونكۇندىگىندە ايرىقشا ورىن الاتىن كۇن. قوعامىمىزدىڭ جاڭعىرۋى كۇللى تابيعاتتىڭ جاڭارۋىمەن تۇسپا-تۇس كەلىپ وتىر. ۋاقىت پەن ىرگەلى وزگەرىستەردىڭ وسىلاي ۇندەسۋى بارشامىزعا وتانىمىزدىڭ يگىلىگى جولىندا ايانباي ەڭبەك ەتۋگە ايرىقشا كۇش-جىگەر بەرەتىنى ءسوزسىز.
رەسپۋبليكا اۋماعىندا "ءمولدىر بۇلاق" باستاماسىن جاپپاي جۇزەگە اسىرۋ قولعا الىندى. بۇل جوبا اياسىندا بۇلاقتاردىڭ كوزىن اشىپ، تال ەگۋ، جاعالاۋلار مەن سۋ ايدىندارىن، اۋلالار مەن ساياباقتاردى تازالاۋ جۇمىستارى جالعاسا بەرەدى"، - دەدى ول.
پرەزيدەنت جاڭا قابىلدانعان حالىق كونستيتۋسياسىندا ازاماتتاردىڭ تابيعاتقا قامقورلىقپەن قاراۋى ۇلتتىق دۇنيەتانىمنىڭ نەگىزگى قاعيداتى رەتىندە ايقىندالعانىن اتاپ ءوتتى.
"جاڭا حالىق كونستيتۋسياسى ەل بىرلىگىنىڭ ارقاۋى، رۋحاني جانە قۇقىقتىق باعدارىمىز ءارى تاۋەلسىزدىگىمىزدىڭ مىزعىماس تۇعىرى بولاتىنى كۇمانسىز.
اتا زاڭىمىز قوعامدا دۇنيەتانىمىمىز بەن ءبىتىم-بولمىسىمىزدىڭ وزەگى سانالاتىن ىنتىماق، جاۋاپتى ءارى جاسامپاز وتانشىلدىق، سونداي-اق "تازا قازاقستان" قۇندىلىقتارىن قالىپتاستىرادى"، - دەپ قوستى ول.
مەملەكەت باسشىسى "تازا قازاقستان" تۇجىرىمداماسىنىڭ ءمانى تەك قورشاعان ورتانى تازا ۇستاۋمەن شەكتەلمەيتىنىن ايتتى.
"تازا قازاقستان" يدەولوگيالىق تۇجىرىمداماسىنىڭ تۇپكى ءمانى كوشەلەردى، اۋلالاردى جانە اينالامىزدى تازا ۇستاۋدان عانا ەمەس، قازاقستان ازاماتتارىنىڭ ءال-اۋقاتىن ارتتىرۋعا باستايتىن نيەت پەن پەيىلدىڭ تازالىعىنان كورىنىس تابادى.
وتانداستارىمىزدى تازارۋ كۇنىمەن قۇتتىقتايمىن!
ءقازىر تابيعات يگىلىكتەرىن ۇقىپتى پايدالانۋ جانە سانالى تۇتىنۋ جولىن تاڭداعان ازاماتتارىمىزدىڭ سانى ارتىپ كەلەدى. بۇل – جارقىن بولاشاعىمىزعا كەپىل بولاتىن يگى ءۇردىس.
مەن بۇكىل حالقىمىزدى تازالىق پەن ءتارتىپ ەستافەتاسىنا بەلسەنە قاتىسۋعا شاقىرامىن.
ءبارىمىز كۇش بىرىكتىرسەك، ەلىمىزدى بيىك بەلەستەرگە جەتەلەپ، ادىلەتتى، تازا، وركەندەگەن قازاقستاندى قۇرا الامىز.
بارشاڭىزعا اماندىق جانە باق-بەرەكە تىلەيمىن!"، - دەپ ءسوزىن تۇيىندەدى توقايەۆ.
