قازاقستاندىق وندىرۋشىلەر ءۇشىن موڭعوليا نارىعىنا شىعۋ ايتارلىقتاي جەڭىلدەدى، دەپ حابارلايدى Dala News.
ءماجىلىس ەاەو مەن موڭعوليا اراسىنداعى ۋاقىتشا ساۋدا كەلىسىمىن راتيفيكاسيالادى، بۇل قۇجات قازاقستان ءۇشىن ەكسپورت گەوگرافياسىن كەڭەيتۋگە، ازىق-تۇلىك قاۋىپسىزدىگىن كۇشەيتۋگە جانە وڭىرلىك ەكونوميكالىق ىقپالدى ارتتىرۋعا باعىتتالعان ماڭىزدى قادام سانالادى.
ءماجىلىس دەپۋتاتى نۇرگۇل تاۋ كەلىسىمنىڭ ستراتەگيالىق سيپاتىنا توقتالدى. ونىڭ ايتۋىنشا، موڭعوليا قازاقستان ءۇشىن تەك كورشى مەملەكەت ەمەس، ازيا باعىتىنداعى سەنىمدى ەكونوميكالىق سەرىكتەس.
كەلىسىم قازاقستاندىق تاۋارلارعا موڭعوليا نارىعىندا كەدەندىك جەڭىلدىكتەر بەرەدى. ەندى وتاندىق وندىرۋشىلەر بيداي، ارپا، جۇگەرى، ۇن، ماكارون جانە كونديتەرلىك ونىمدەردى باج سالىعىنسىز ەكسپورتتاي الادى. بۇعان دەيىن بۇل تاۋارلار قوسىمشا كەدەندىك تولەمدەرگە ۇشىراپ كەلگەن.
دەپۋتاتتىڭ سوزىنشە، كەلىسىم تەك ساۋدا كولەمىن ۇلعايتىپ قويماي، قوسىلعان قۇنى جوعارى ونىمدەرگە نەگىزدەلگەن جاڭا ەكونوميكالىق تىزبەكتەردى قالىپتاستىرۋعا مۇمكىندىك بەرەدى. بۇل قازاقستاننىڭ شيكىزاتقا تاۋەلدىلىگىن ازايتىپ، وڭدەۋشى سەكتوردىڭ دامۋىنا سەرپىن بەرەدى.
ساۋدا جانە ينتەگراسيا ءمينيسترىنىڭ مىندەتىن اتقارۋشى جانەل كۋشاكوۆانىڭ مالىمەتىنشە، قۇجات ەاەو ەلدەرى مەن موڭعوليا اراسىندا 367 تاۋار پوزيسياسى بويىنشا يمپورتتىق باجداردى الىپ تاستاۋدى كوزدەيدى. كەلىسىم ءۇش جىلعا جاسالىپ، تاراپتاردىڭ كەلىسىمىمەن اۆتوماتتى تۇردە تاعى ءۇش جىلعا ۇزارتىلۋى مۇمكىن.
قۇجاتتا تەحنيكالىق رەتتەۋ، سانيتارلىق جانە فيتوسانيتارلىق تالاپتار، كەدەندىك ىنتىماقتاستىق جانە ىشكى نارىقتى قورعاۋ تەتىكتەرى دە قامتىلعان. مينيسترلىك وكىلدەرى كەلىسىمدى ىسكە اسىرۋ رەسپۋبليكالىق بيۋدجەتكە قوسىمشا سالماق سالمايتىنىن اتاپ ءوتتى.
ساراپشىلاردىڭ پىكىرىنشە، بۇل شەشىم قازاقستاننىڭ موڭعولياداعى پوزيسياسىن كۇشەيتىپ قانا قويماي، ەلدىڭ ازىق-تۇلىك ەكسپورتىن ازيا نارىقتارىنا جۇيەلى تۇردە شىعارۋعا جول اشادى. الداعى كەزەڭدە ەكى ەل اراسىنداعى تاۋار اينالىمىن 500 ملن دوللارعا دەيىن ارتتىرۋ كوزدەلىپ وتىر.
