2025 جىلى قازاقستان بانكتەرى ەلگە 2،7 ملرد دوللار قولما-قول ۆاليۋتا يمپورتتاعان، دەپ حابارلايدى Dalanews.kz.
رۋچنايا ەكونوميكا تەلەگرام ارناسىنىڭ مالىمەتىنشە، بۇل – كەيىنگى بەس جىلداعى ەڭ جوعارى كورسەتكىشتەردىڭ ءبىرى. بۇعان دەيىن رەكورد 2022 جىلى تىركەلىپ، سول كەزدە بانكتەر 3،9 ملرد دوللار اكەلگەن.
بىلتىر دوللار جەتكىزۋدىڭ ەڭ جوعارى كولەمى ءتورتىنشى توقساندا بايقالدى. ءدال وسى كەزەڭدە تەڭگە باعامى 500–550 تەڭگە ارالىعىندا قۇبىلىپ تۇردى. وسى ۋاقىتتا بانكتەر شامامەن 1 ملرد دوللار تاسىمالداعان.
سالىستىرۋ ءۇشىن:
- 2024 جىلى – 1،1 ملرد دوللار،
- 2023 جىلى – 1،7 ملرد دوللار،
- 2022 جىلى – 3،9 ملرد دوللار اكەلىنگەن.
ساراپشىلار مۇنى بانكتەردىڭ اينالىمداعى ۆاليۋتانى جاڭارتۋ ۇدەرىسىمەن بايلانىستىرادى. بۇعان دەيىن 2013 جىلعا دەيىن شىعارىلعان ەسكى ۇلگىدەگى دوللارلاردى بانكتەر 1–5% كوميسسيامەن قابىلداپ كەلگەنى بەلگىلى. ال ۇلتتىق بانك تاراپىنان بۇل وپەراسيالار ءۇشىن نەبارى 0،3% كوميسسيا الىنعان.
