Astanada 55 jastaǵy er adam naýqas anasyn tunshyqtyryp óltirip, keıin ony ózine qol jumsaǵandaı etip kórsetýge tyrysqan, dep habarlaıdy Dalanews.kz.
2025 jyldyń shildesinde Sergeı Ovsánnıkov jedel járdem shaqyryp, anasynyń jaǵdaıy kúrt nasharlaǵanyn habarlaǵan. Dárigerler kelgen kezde egde jastaǵy áıeldiń qaıtys bolǵanyn anyqtady. Marqum uzaq ýaqyttan beri tósekke tańylyp jatqan. Alaıda tekserý barysynda onyń moınynan kógergen izder tabylyp, ólimniń tunshyqtyrý saldarynan bolǵany belgili boldy.
Bastapqyda er adam anasy syrqatyna baılanysty ózin-ózi óltirýge áreket jasaǵanyn, al ózi ony qutqarmaq bolǵanyn aıtqan. Biraq kórshileri men tanystary onyń esh jerde jumys istemeı, anasynyń zeınetaqysymen kún kórgenin, ishimdikke áýes bolǵanyn jáne janjalǵa beıim ekenin jetkizdi. Tergeý men saraptamalar osy málimetterdi rastady.
Nátıjesinde sot ony adam óltirgeni úshin kináli dep tanyp, 11 jylǵa bas bostandyǵynan aıyrý jazasyn taǵaıyndady. Úkim ázirge zańdy kúshine engen joq.
