Áleýmettik jelilerde Atyraý oblysynda joǵalǵan otbasyǵa qatysty túrli málimet tarap, qoǵam nazaryn aýdaryp otyr. Ásirese, jeli qoldanýshylary Hacker Atyrau paraqshasynda jarıalanǵan aqparatty qyzý talqylap jatyr, dep habarlaıdy Dalanews.kz.
Paraqsha avtory ashyq baza arqyly joǵalǵandardyń SIM-kartalaryn baqylaǵanyn, bank kartasymen jasalǵan tólemderdi anyqtaǵanyn aıtty. Ol osy otbasy joǵalǵannan keıin biriniń SIM-kartasy mezgil-mezgil qoldanylyp otyrǵanyn da málimdedi. Sondaı-aq, otbasy músheleriniń biriniń bank kartasynan qarasha jáne jeltoqsanda zeınetaqy tólemderi alynǵany týraly aqparat taraǵan bolatyn.
Aqparatty taratqan adamnyń ózi memlekettik júıelerdi buzbaǵanyn, tek "ashyq derekterdi, SIM-kartalardy jáne baılanys operatorlarynan alynǵan málimetterdi" paıdalanǵanyn aıtty.
Búgin BAQ ókilderine bergen jaýabynda polısıa "atyraýlyq hakerge" qatysty da pikir bildirdi.
"Ol (Hacker Atyrau paraqshasynyń ıesi - esk.) bizdiń memlekette emes, basqa shetelde júr. Ol halyqqa qol ushyn berip, kómekteskisi kelip, áreketter jasap jatyr. Bizde jedel jumystar bar, keıbir áreketteri bizge qarama-qaıshy keledi. Jumysymyzdy ári qaraı júrgizý úshin ońdy-soldy málimet bermegen durys", - dedi Atyraý oblysy Polısıa departamenti bastyǵynyń birinshi orynbasary, polısıa polkovnıgi Quttybaı Sadyqov.
Eske salaıyq, buǵan deıin Atyraý oblysynda bir otbasy izdestirilip jatqany habarlandy. Polısıaǵa aryz 25 jeltoqsanda túsken.
Buǵan deıin Atyraý oblysy PD ókilderi joǵalǵan adamdardyń uıaly telefondarynan sıgnaldar Qazaqstan aýmaǵynda birneshe ret tirkelip, qosylyp-sóndirilgeni anyqtalǵanyn málimdedi.
"Sońǵy tirkelgen derek Shymkent qalasynda bolǵan. İzdestirý jumystaryn úılestirý maqsatynda arnaıy jedel tergeý toby qurylyp, oǵan İshki ister mınıstrliginiń mamandary da jumyldyryldy. Sonymen qatar, qazir osy otbasynyń kishi qyzy men kúıeý balasy shet memlekette júrgeni anyqtaldy. Alaıda týystary olardyń joǵalýyna baılanysty aryz túsirmegen. Soǵan qaramastan quqyq qorǵaý organdary tekserý jumystaryn bastady", - dedi polısıa.
