Microsoft álemde jasandy ıntellektiniń (JI) taralýyna arnalǵan AI Diffusion Report atty jahandyq baıandamasyn jarıalady. Bul esepte alǵash ret ár elde halyqtyń jasandy ıntellekt quraldaryn naqty paıdalaný deńgeıi biryńǵaı ádisteme arqyly ólshengen, dep habarlaıdy Dalanews.kz.
Atalǵan kórsetkish boıynsha Qazaqstan 147 eldiń ishinde 71-orynǵa jaıǵasty. Eldegi AI User Share deńgeıi 12,7% boldy. Postkeńestik elder arasynda Qazaqstannan joǵary nátıje kórsetken memleketter qatarynda Lıtva (41-oryn, 21%), Grýzıa (53-oryn, 17,3%), Moldova (58-oryn, 16,6%) jáne Ázirbaıjan (64-oryn, 14,2%) bar.
Al reıtıńte Qazaqstannan tómen turǵan elderge Ýkraına (93-oryn, 9,1%), Reseı (117-oryn, 7,6%), Belarýs (118-oryn, 7,6%), Qyrǵyzstan (119-oryn, 7,6%), Armenıa (138-oryn, 7,6%), Ózbekstan (143-oryn, 5,7%), Tájikstan (145-oryn, 5,1%) jáne Túrikmenstan (146-oryn, 5,1%) engen.
Osylaısha, Qazaqstan jasandy ıntellektini qoldaný deńgeıi boıynsha Ortalyq Azıa elderiniń basym bóliginen jáne TMD memleketteriniń kópshiliginen alda keledi.
Baıandama avtorlarynyń málimetinshe, jasandy ıntellekt adamzat tarıhyndaǵy eń jyldam taralǵan tehnologıa. Úsh jylǵa jetpeıtin ýaqyt ishinde álem boıynsha JI paıdalanýshylar sany 1 mıllıard adamnan asqan. Al ınternet pen smartfondardyń mundaı aýqymǵa jetýine ondaǵan jyl qajet bolǵan.
Degenmen bul ósim birkelki emes. Jasandy ıntellektiniń keń taralýy elektr qýatynyń turaqtylyǵy, keńjolaqty ınternet, qoljetimdi sıfrlyq qurylǵylar jáne halyqtyń sıfrlyq daǵdylary sıaqty bazalyq ınfraqurylymǵa tikeleı baılanysty.
Reıtıń kóshbasynda Birikken Arab Ámirlikteri (59,4%), Sıngapýr (58,6%) jáne Norvegıa (shamamen 45,3%) tur. Sondaı-aq slǵashqy ondyqqa Irlandıa, Fransıa, Ispanıa, Jańa Zelandıa, Ulybrıtanıa, Nıderland jáne Katar engen.
Sonymen qatar Afrıka, Ońtústik Azıa jáne birqatar postkeńestik elderdiń kópshiligi 10 paıyzdan tómen kórsetkishpen reıtıńtiń tómengi bóliginde qalyp otyr. Microsoft baǵalaýynsha, Jer shary halqynyń shamamen jartysy jasandy ıntellektini paıdalaný úshin qajetti ınfraqurylymǵa áli de tolyq qol jetkize almaı otyr.
Qujatta JI-diń taralýy halyq tabysynyń deńgeıimen ǵana emes, memlekettik sıfrlandyrý baǵdarlamalaryna, bilimge salynǵan ınvestısıaǵa, startap-ekojúıelerdiń damýyna jáne derekterdi retteý saıasatyna da tikeleı baılanysty ekeni atalǵan. Bul faktorlar júıeli túrde damyǵan elderde jasandy ıntellekt ekonomıka, bilim berý, medısına jáne memlekettik basqarý salalarynda jappaı qoldanylatyn quralǵa aınalyp keledi.
