Jazýshy ári baspager Eldos Toqtarbaı Qazaqstan Jazýshylar odaǵy (QJO) janyndaǵy Balalar men jasóspirimder ádebıeti janrlyq keńesiniń tóraǵasy qyzmetinen alynǵanyn habarlady. Onyń aıtýynsha, mundaı sheshim Til máselesine qatysty jazbalaryna baılanysty qabyldanǵan, dep habarlaıdy Dalanews.kz.
Baspagerdiń sózinshe, bul sheshim saparda júrgen kezinde qabyldanypty. Ol QJO tóraǵasy Mereke Qulkenovtiń keńes tóraǵasy qyzmetinen bosatý týraly sheshim shyǵarǵanyn, sondaı-aq keńestegi eki áriptesine de «ornyn bosatsyn» degen nusqaý berilgenin jazdy.
«Eki aptadaı elden jyraq, saparda júrgenimde, meni QJO Tóraǵasy Mereke aǵa Qulkenov Balalar men jasóspirimder ádebıeti janrlyq keńesiniń tóraǵasy qyzmetinen TİL týraly jazǵan jazbalarym úshin alyp tastapty. Keńestegi eki áriptesime “Ornyn bosatsyn!” dep ámir beripti», – dep jazdy ol.
Eldos Toqtarbaı bul qyzmettiń qoǵamdyq negizde, aqysyz atqarylǵanyn atap ótti.
«Anyǵynda, bul - qoǵamdyq qyzmet, ıakı bir tıyn almaıtyn aqysyz-pulsyz jumys», – dedi ol.
Jazýshynyń aıtýynsha, onyń basty maqsaty laýazym emes, ulttyq balalar ádebıetiniń bedelin kóterý bolǵan. Ol keńes jumysyna belsendi kirisip, birqatar jobany iske asyrǵanyn atap ótti.
«Meniń kózdegenim - qyzmet emes edi, ulttyq balalar ádebıetiniń bedelin kóterip, keńes jumysyn jandandyryp, búkil qazaq balalar jazýshylarynyń joqtaýshysy, qorǵaýshysy bolsam degen aq nıetim ǵana bolǵan-tyn», – dedi ol.
Avtor bes aıdyń ishinde keńes aıasynda birqatar naqty jumys atqarylǵanyn jazdy. Atap aıtqanda, umyt qalǵan balalar jazýshylaryn túgendeý, ómirden ótken qalamgerlerdi ulyqtaý, birneshe kitap serıasyn iske qosý, barlyǵy toǵyz kitap shyǵarý jáne taǵy jeti kitapty baspaǵa daıyndaý qolǵa alynǵan.
Sonymen qatar, onyń málimetinshe, elimiz boıynsha balalar taqyrybynda qalam terbeıtin 117 jazýshy biriktirilip, ortaq ádebı baza jasalǵan.
«Osy keńeske kele sala umyt qalǵan balalaryn jazýshylaryn túgendep, ómirden ótkenderin ulyqtap… QR boıynsha balalar taqyrybyna jazatyn kári-jasy bar 117 jazýshynyń basyn ortaq chatqa qosyp, ádebı baza jasadyq», – dep jazdy ol.
Eldos Toqtarbaı jýyrda jas ata-analar men balalarǵa arnalǵan, táýlik boıy tegin qyzmet kórsetetin «QJO Balalar ádebıeti» atty ádebı saıt ashýdy josparlap júrgenin de aıtty. Alaıda dál osy sátte qyzmetten alynǵanyn qynjyla jetkizdi.
Avtor óz jazbasynda bul sheshimge qatysty túrli áńgimelerdiń taraǵanyn da joqqa shyǵarmady.
«“Myna bala Odaq tóraǵasy bolǵaly júr” degen sypsyń sóz taraǵanyn ózim de talaı estigenmin. Biraq sol qańqý sózdiń birin de elemeı, eńbektene berippiz», – dedi ol.
Sóz sońynda Eldos Toqtarbaı til máselesinde ustanymynan aınymaıtynyn meńzep, áriptesterinen keshirim surady.
«Tiliniń múddesi taptalǵan jerde taq úshin jantalasyp, ólermendik tanytý - súıegine Alash rýhy sińgen azamatqa jarasar qylyq emes!», – dep túıindedi ol.
