Astanada ekinshi naryqtaǵy turǵyn úıdiń ortasha baǵasy tarıhı shekten asyp, bir sharshy metri 600 myń teńgege jetti, dep habarlaıdy Dala News.
Krisha.kz júrgizgen monıtorıńke sáıkes, 2026 jylǵy qańtarda Qazaqstan boıynsha ekinshi naryqtaǵy páterler orta eseppen 2% qymbattaǵan. Eń joǵary ósim Astanada tirkelip, bir aıda baǵa 5,2% artty. Qazirgi tańda elordada bir sharshy metrdiń ortasha quny 601 740 teńgeni quraıdy.
Baǵa ósimi Kókshetaýda 3,2%, Qaraǵandy men Óskemende 3%, Semeıde 2,8% boldy. Basqa qalalarda qymbattaý 1–2,6% aralyǵynda saqtalǵan.
Almaty men Aqtóbe ǵana baǵanyń azdap tómendeýin kórsetti. Almatyda páter quny 0,1% arzandasa, Aqtóbede 0,4% túsken. Soǵan qaramastan, Almaty áli de eldegi eń qymbat qala bolyp otyr – munda ekinshi naryqtaǵy bir sharshy metr 804 695 teńge turady.
Qańtar aıynyń qorytyndysy boıynsha Qazaqstanda ekinshi naryqtaǵy turǵyn úıdiń ortasha baǵasy 419 126 teńge boldy. Shymkentte bul kórsetkish 490 000 teńgeni qurasa, eń arzan qalalar qatarynda Qyzylorda (269 083 teńge), Taraz (321 653 teńge) jáne Aqtóbe (324 013 teńge) tur.
Jyldyq esepte, 2025 jyldyń qańtarymen salystyrǵanda, ekinshi naryqtaǵy páterler el boıynsha 9% qymbattaǵan. Eń joǵary ósim Aqtaýda – 22,7%, Astanada – 16,2% jáne Qostanaıda – 13,5% tirkelgen.
