ءماجىلىس دەپۋتاتى ءابىل ەركىن قازاقستاننىڭ جاڭا كونستيتۋسيا جوباسىندا تاريحي ساباقتاستىق قاعيداتىنىڭ ەرەكشە مانگە يە ەكەنىن مالىمدەدى. ونىڭ ايتۋىنشا، بۇل نورما مەملەكەتتىڭ مىڭجىلدىق دامۋ تاريحىن، ۇلتتىق مادەني كودىن جانە باسقارۋ تاجىريبەسىن قۇقىقتىق دەڭگەيدە ايقىندايدى، دەپ حابارلايدى Dalanews.kz.
دەپۋتات «ۇلى دالا» ۇعىمىنىڭ كونستيتۋسيادا كورىنىس تابۋىن تاريحي ساباقتاستىقتى زاڭنامالىق تۇرعىدا بەكىتۋدىڭ ناقتى دالەلى دەپ اتادى.
– «ۇلى دالا» ۇعىمى – ەموسيالىق نەمەسە پوەتيكالىق تىركەس ەمەس. بۇل – قازاقستان مەملەكەتتىلىگىنىڭ تاريحي كەڭىستىگىن، مادەني كودىن جانە جاۋاپكەرشىلىك فيلوسوفياسىن بىلدىرەتىن ناقتى ۇعىم. تاريحي ساباقتاستىق ەلدىڭ وتكەنىن، بۇگىنىن جانە بولاشاعىن جالعايتىن قۇقىقتىق كوپىر ىسپەتتى، – دەدى ءابىل ەركىن.
ونىڭ ايتۋىنشا، بۇل ۇستانىم مەملەكەتتىڭ تەرەڭ تامىرىن، ۇلتتىق ءداستۇرى مەن وركەنيەتتىك ساباقتاستىعىن ءوز ازاماتتارىنا عانا ەمەس، حالىقارالىق قاۋىمداستىققا دا ايقىن كورسەتەدى. سونىمەن قاتار دەپۋتات تاريحي ساباقتاستىقتى كونستيتۋسيادا بەكىتۋ حالىقارالىق تاجىريبەگە ساي كەلەتىنىن اتاپ ءوتتى.
– جۇڭگو، ۆەنگريا، پولشا، ليتۆا سەكىلدى مەملەكەتتەر ءوز كونستيتۋسيالارىندا تاريحي ساباقتاستىقتى ۇلتتىق ەگەمەندىكتىڭ نەگىزى رەتىندە ناقتىلاعان. بۇل ەشقانداي بولىنۋشىلىككە نەمەسە ارتىقشىلىققا اكەلگەن جوق، كەرىسىنشە، مەملەكەتتىڭ تۇتاستىعى مەن تۇراقتىلىعىن نىعايتتى، – دەدى ول.
ءابىل ەركىن بۇل نورما قوعامدى بولمەيتىنىن، كەرىسىنشە ورتاق تاريح پەن قۇندىلىقتار توڭىرەگىندە بىرىكتىرەتىنىن ايتتى. ول ءابىش كەكىلبايەۆتىڭ «ەلدىكتى، بىرلىكتى ساقتايتىن – ادامداردىڭ ورتاق ويى مەن ورتاق مۇددەسى» دەگەن ءسوزىن مىسالعا كەلتىرىپ، تاريحي سانانىڭ جاس ۇرپاق ءۇشىن دە ماڭىزدى ەكەنىن جەتكىزدى.
سونداي-اق دەپۋتات جاڭا كونستيتۋسيادا مەملەكەتتىڭ ۋنيتارلى سيپاتى مەن باسقارۋ ۇلگىسى ناقتى ايقىندالعانىنا توقتالدى. ونىڭ ايتۋىنشا، بۇل اۋماقتىق تۇتاستىقتى، قۇقىقتىق كەڭىستىكتىڭ بىرلىگىن جانە باسقارۋ جۇيەسىنىڭ ايقىندىعىن قامتاماسىز ەتەتىن ماڭىزدى نورما.
– جاڭا رەداكسيادا «قازاقستان رەسپۋبليكاسى – ۋنيتارلى مەملەكەت. باسقارۋ ۇلگىسى – پرەزيدەنتتىك رەسپۋبليكا» دەپ ناقتى جازىلعان. بۇل – تۇراقتىلىق پەن ءبىرتۇتاستىقتىڭ كەپىلى، – دەدى ول.
سونىمەن قاتار كونستيتۋسيانىڭ 3-بابىنداعى «مەملەكەتتىك بيلىكتىڭ بىردەن-بىر باستاۋى جانە ەگەمەندىك يەسى – قازاقستان حالقى» دەگەن نورما دا ناقتىلانعان. دەپۋتاتتىڭ پىكىرىنشە، بۇل حالىقتىڭ بيلىكتىڭ ناقتى سۋبەكتىسى رەتىندە تانىلۋىن بىلدىرەدى جانە مەملەكەتتىڭ زاڭدىلىعىن كۇشەيتەدى.
قورىتىندىلاي كەلە، ءابىل ەركىن جاڭا كونستيتۋسيانى جاڭا ءداۋىردىڭ قۇقىقتىق قاڭقاسى دەپ اتاپ، تاريحي ساباقتاستىق پەن «ۇلى دالا» ۇعىمى وسى قاڭقانى رۋحاني مازمۇنمەن تولىقتىراتىنىن ايتتى.
– تاريحىنا سۇيەنگەن، ەگەمەندىگىن قورعاي بىلەتىن، ءبىرتۇتاس مەملەكەتتىلىكتى بەكىتكەن ەل عانا بولاشاعىن نىق قۇرا الادى، – دەپ تۇيىندەدى دەپۋتات.
