ناۋرىزناما ونكۇندىگى اياسىنداعى تازارۋ كۇنىنە وراي جەتىسۋ وبلىسىندا بۇلاق تازالاۋعا ارنالعان «ءمولدىر بۇلاق» اۋقىمدى ەكولوگيالىق اكسياسى ءوتىپ، وڭىردەگى سەگىز بۇلاقتىڭ ءسوزى اشىلدى. كوكسۋ اۋدانىندا وتكەن وسىنداي اكسياعا وبلىس اكىمى بەيبىت يسابايەۆ قاتىستى، دەپ حابارلايدى Dalanews.kz.
جەتىسۋ وبلىسى اكىمىنىڭ باسپا ءسوز قىزمەتىنىڭ مالىمەتىنشە، كوكسۋ اۋدانى بەسقاينار اۋىلىنداعى بۇلاق باسىنا 200-دەن استام ادام جينالدى. ولاردىڭ قاتارىندا اۋىل تۇرعىندارى، كوللەدج ستۋدەنتتەرى، وڭىردەگى سۋ شارۋاشىلىعى مەكەمەلەرىنىڭ وكىلدەرى بار.
جينالعانداردى تازارۋ كۇنىمەن قۇتتىقتاعان وبلىس اكىمى بەيبىت يسابايەۆ ناۋرىز مەيرامى ءمانىنىڭ ادامنىڭ رۋحاني تازارۋىمەن اساتاسىپ جاتقانىن اتاپ ءوتتى:
- سوڭعى جىلدارى «تازا قازاقستان» باعدارلاماسىنىڭ اياسىندا مەملەكەت باسشىسىنىڭ باستاماسىمەن «مەنىڭ اۋلام - مەنىڭ كوشەم - مەنىڭ اۋىلىم – مەنىڭ ەلىم» فورماتىندا جىل بويى قورشاعان ورتانى تازالاۋ، اعاش ەگۋ، ساياباقتار مەن سكۆەرلەر سالۋ، سۋارۋ جۇيەلەرىن جاقسارتۋ ماسەلەسىنە وتە ۇلكەن ءمان بەرىلىپ كەلەدى. ءبىز تابيعاتى تازا، سۋى ءمولدىر، ءشوبى شۇرايلى جەتىسۋ جەرىن ۇرپاقتارىمىزعا تازا، قۇنارلى قالپىندا قالدىرۋىمىز كەرەك. وسىنداي ماقساتتا بۇگىنگى تازارۋ كۇنىندە بۇلاقتىڭ كوزىن تازالاپ، اعاش ەگەمىز. بۇل ەكولوگيانى جاقسارتىپ قانا قويماي، ادامداردىڭ ءومىر ءسۇرۋ جاعدايىن جاقسارتۋعا ىقپال ەتەدى، - دەگەن ب. يسابايەۆ بارلىق اۋدان ورتالىقتارىندا ساياباقتار قايتا جاڭعىرلىتىپ، سۋارۋ جۇيەلەرى جولعا قويىلاتىنىن جەتكىزدى، سونداي-اق بۇگىنگى شاراعا بەلسەنە قاتىسىپ وتىرعان ازاماتتارعا ريزاشىلىعىن ءبىلدىردى.
سونداي-اق سۋ رەسۋرستارى جانە يرريگاسيا مينيسترلىگى سۋ رەسۋرستارى كوميتەتىنىڭ ءتوراعاسى ارسەن جاقانبايەۆ، كوكسۋ اۋداندىق اقساقالدار القاسىنىڭ ءتوراعاسى سايلاۋباي ءبازىلوۆ، «ەكولوگيالىق ەرىكتىلەر» ۇيىمىنىڭ مۇشەسى ۇلان ۋالييەۆ ءسوز الىپ، ءىس-شارانىڭ جاس ۇرپاققا تاعىلىمى مول، تابيعاتقا جاسالعان ۇلكەن قامقورلىق ەكەنىن ايتتى.
مۇنان سوڭ وبلىس باسشىسى اۋىل تۇرعىندارىمەن بىرگە بۇلاقتىڭ كوزىن اشىپ، جاس كوشەتتەر وتىرعىزدى.
اكسياعا قاتىسۋشىلاردىڭ ءبىرى «قازىنا» بالاباقشاسىنىڭ قىزمەتكەرى داۋرەن رايىمبەكوۆ تە پىكىرىن ءبىلدىردى:
- بالالارىمىزدى تازالىققا بەيىمدەسەك، قورشاعان ورتاعا قامقورلىق جاساۋعا ۇيرەتسەك، ونى ءسوز جۇزىندەگى اقىل ايتۋ ەمەس، ءوزىمىز ىستەپ ۇلگىمىزبەن كورسەتسەك، بۇل ناتيجەلى بولادى. بۇگىنگى شارا – سونىڭ ءبىر ايقىن كورىنىسى. بۇلاق – حالقىمىزدا سۋدىڭ باسى، تىرشىلىكتىڭ كوزى. سوندىقتان بۇلاقتى اشۋ – كوكتەمدەگى وتە ماڭىزدى ءىس، - دەدى ول.
اتاپ وتسەك، وسىنداي ءىس-شارالار كوكسۋ اۋدانىمەن قاتار اقسۋ، الاكول، ەسكەلدى، قاراتال جانە پانفيلوۆ اۋداندارىندا ءوتىپ، ءبىر كۇندە جالپى سانى سەگىز بۇلاقتىڭ كوزى اشىلدى. بۇلاق ماڭىن تازالاۋ مەن اباتتاندىرۋ جۇمىستارى جۇرگىزىلىپ، ءبىر بۇلاقتا تابيعي جەر بەتىنە شىعۋ كوزى قالپىنا كەلتىرىلدى. بۇل باستاۋ كوزدەردىڭ سۋى اۋىز سۋ، ەمدىك جانە شارۋاشىلىق-تۇرمىستىق قاجەتتىلىكتەر ءۇشىن پايدالانىلىپ، سۋ رەسۋرستارى تاپشىلىعى جاعدايىندا سۋمەن قامتاماسىز ەتۋدىڭ قوسىمشا كوزى رەتىندە قاراستىرىلادى.
جالپى «ءمولدىر بۇلاق» اكسياسى اياسىندا وبلىس كولەمىندە «7 OZEN» ەكولوگيالىق ءىس-شاراسى 23 ناۋرىزدان باستاپ 2 مامىرعا دەيىن جالعاسىپ، وڭىردەگى قاراتال، كوكسۋ، لەپسى، اقسۋ، بۇيەن، ىلە، باسقان وزەندەرىنىڭ جاعالاۋلارى جانە بۇلاق كوزدەرى تازارتىلادى.
