استاناعا كىرەبەرىستە ءىرى شىركەۋ سالۋ باستاماسى ءماسليحات دەپۋتاتى باۋىرجان سمايلوۆتىڭ سىنىنا ۇشىرادى، دەپ حابارلايدى Dala News.
استانا قالالىق ءماسليحاتىنىڭ وتىرىسىندا ەلورداعا كىرەبەرىس اۋماقتا ورتالىق ازياداعى ەڭ ءىرى شىركەۋ سالۋ جوسپارى تالقىلانىپ، دەپۋتات باۋىرجان سمايلوۆ بۇل باستاماعا اشىق قارسىلىق ءبىلدىردى.
دەپۋتاتتىڭ ايتۋىنشا، قالادا ءتۇرلى كونفەسسيالارعا ارنالعان عيبادات ورىندارى جەتكىلىكتى، ال ەلوردا قاقپاسىنا اۋقىمدى شىركەۋ سالۋ قوعام ءۇشىن ماقتاناتىن جوبا ەمەس.
«ورتالىق ازياداعى ەڭ ۇلكەن شىركەۋ سالىنباق دەيدى. وعان قارجىنى كىم ءبولىپ جاتىر؟ ونداي نىسان بىزگە شىنىمەن قاجەت پە؟ ءبىز بۇل ماسەلەنى جان-جاقتى تالدادىق پا؟ قالادا شىركەۋلەر بار، ۇلكەنى دە، كىشىسى دە جەتكىلىكتى. ال ەلوردانىڭ كىرەبەرىسىنە وسىنداي نىسان سالۋ ماقتاناتىن جاعداي ەمەس»، – دەدى باۋىرجان سمايلوۆ ءماسليحات وتىرىسىندا.
بۇل سىنعا جاۋاپ بەرگەن نۇرا اۋدانىنىڭ اكىمى ريشات تۇردىبەكوۆ جوبانىڭ بۇرىننان بەكىتىلگەنىن العا تارتتى. ونىڭ ايتۋىنشا، شىركەۋ قۇرىلىسى مەملەكەتتىك بيۋدجەت ەسەبىنەن سالىنبايدى.
«بۇل نىسان باس جوسپارعا سايكەس قاراستىرىلعان. مەشىت بولسىن، شىركەۋ بولسىن بيۋدجەتتەن قارجى بولىنبەيدى. قۇرىلىس قايىرىمدىلىق قاراجات ەسەبىنەن جۇرگىزىلەدى. اتالعان جوسپار 2018–2019 جىلدارى بەكىتىلگەن»، – دەدى اۋدان اكىمى.
سونىمەن قاتار، ريشات تۇردىبەكوۆ بۇل ماسەلە بويىنشا كەيىنىرەك قوسىمشا اقپارات بەرىلەتىنىن مالىمدەدى.
ايتا كەتەيىك، ەلوردا اۋماعىنداعى ءىرى قۇرىلىس جوبالارى قوعامدا ءجيى پىكىرتالاس تۋدىرىپ كەلەدى. بۇل جولى دا قالا كەلبەتى مەن قوعامدىق سۇرانىس اراسىنداعى تەپە-تەڭدىك ماسەلەسى كۇن تارتىبىنە شىقتى.
