وزبەكستان ورتالىق ازيادا العاش بولىپ برازيليادا شىعارىلاتىن C-390 Millennium اسكەري-كولىك ۇشاقتارىن قارۋلانۋىنا ەنگىزبەك، دەپ حابارلايدى Dalanews.kz.

C-390 Millennium ۇشاعى 26 تونناعا دەيىن جۇك تاسىمالداۋعا قابىلەتتى، ساعاتىنا 870 شاقىرىمعا دەيىن جىلدامدىق الادى جانە توپىراق ۇشۋ-قونۋ جولاقتارىندا پايدالانۋعا بولادى.

قازىرگى تاڭدا وزبەكستان اسكەري-اۋە كۇشتەرىنىڭ پاركىندە يسپانيادا شىعارىلعان C-295 ۇلگىسىندەگى ءتورت ۇشاق بار. ولاردىڭ جۇك كوتەرگىشتىگى 9،2 توننا. الايدا مامانداردىڭ پىكىرىنشە، بۇل ۇشاقتار جەرگىلىكتى كليماتتىق جاعدايعا تولىق بەيىمدەلمەگەن: ۇزارتىلعان ۇشۋ-قونۋ جولاقتارىن قاجەت ەتەدى، ءارى جوعارى تەمپەراتۋرادا جۇك كوتەرۋ مۇمكىندىگى تومەندەيدى.

ساراپتامالىق پىكىرلەردە وزبەكستاننىڭ ءدال وسى برازيليالىق ۇشاقتى تاڭداۋى داۋلى شەشىم رەتىندە باعالانىپ وتىر. سەبەبى ەل 2012 جىلعا دەيىن الەمدەگى ەڭ ۇزدىك اسكەري-كولىك ۇشاقتارىنىڭ ءبىرى سانالاتىن يل-76 ۇلگىسىن ءوزى وندىرگەن.

سالىستىرۋ ءۇشىن: انىقتامالىق دەرەكتەرگە سايكەس، 60 توننا جۇك كوتەرەتىن يل-76 ۇشاعىنىڭ كاتالوجدىق باعاسى شامامەن 27 ملن دوللار، ال 26 توننا جۇككە ەسەپتەلگەن C-390 Millennium ۇشاعىنىڭ باعاسى 50 ملن دوللار.