Microsoft الەمدە جاساندى ينتەللەكتىنىڭ (جي) تارالۋىنا ارنالعان AI Diffusion Report اتتى جاھاندىق بايانداماسىن جاريالادى. بۇل ەسەپتە العاش رەت ءار ەلدە حالىقتىڭ جاساندى ينتەللەكت قۇرالدارىن ناقتى پايدالانۋ دەڭگەيى ءبىرىڭعاي ادىستەمە ارقىلى ولشەنگەن، دەپ حابارلايدى Dalanews.kz.
اتالعان كورسەتكىش بويىنشا قازاقستان 147 ەلدىڭ ىشىندە 71-ورىنعا جايعاستى. ەلدەگى AI User Share دەڭگەيى 12،7% بولدى. پوستكەڭەستىك ەلدەر اراسىندا قازاقستاننان جوعارى ناتيجە كورسەتكەن مەملەكەتتەر قاتارىندا ليتۆا (41-ورىن، 21%)، گرۋزيا (53-ورىن، 17،3%)، مولدوۆا (58-ورىن، 16،6%) جانە ءازىربايجان (64-ورىن، 14،2%) بار.
ال رەيتينگتە قازاقستاننان تومەن تۇرعان ەلدەرگە ۋكراينا (93-ورىن، 9،1%)، رەسەي (117-ورىن، 7،6%)، بەلارۋس (118-ورىن، 7،6%)، قىرعىزستان (119-ورىن، 7،6%)، ارمەنيا (138-ورىن، 7،6%)، وزبەكستان (143-ورىن، 5،7%)، تاجىكستان (145-ورىن، 5،1%) جانە تۇرىكمەنستان (146-ورىن، 5،1%) ەنگەن.
وسىلايشا، قازاقستان جاساندى ينتەللەكتىنى قولدانۋ دەڭگەيى بويىنشا ورتالىق ازيا ەلدەرىنىڭ باسىم بولىگىنەن جانە تمد مەملەكەتتەرىنىڭ كوپشىلىگىنەن الدا كەلەدى.
بايانداما اۆتورلارىنىڭ مالىمەتىنشە، جاساندى ينتەللەكت ادامزات تاريحىنداعى ەڭ جىلدام تارالعان تەحنولوگيا. ءۇش جىلعا جەتپەيتىن ۋاقىت ىشىندە الەم بويىنشا جي پايدالانۋشىلار سانى 1 ميلليارد ادامنان اسقان. ال ينتەرنەت پەن سمارتفونداردىڭ مۇنداي اۋقىمعا جەتۋىنە ونداعان جىل قاجەت بولعان.
دەگەنمەن بۇل ءوسىم بىركەلكى ەمەس. جاساندى ينتەللەكتىنىڭ كەڭ تارالۋى ەلەكتر قۋاتىنىڭ تۇراقتىلىعى، كەڭجولاقتى ينتەرنەت، قولجەتىمدى سيفرلىق قۇرىلعىلار جانە حالىقتىڭ سيفرلىق داعدىلارى سياقتى بازالىق ينفراقۇرىلىمعا تىكەلەي بايلانىستى.
رەيتينگ كوشباسىندا بىرىككەن اراب امىرلىكتەرى (59،4%)، سينگاپۋر (58،6%) جانە نورۆەگيا (شامامەن 45،3%) تۇر. سونداي-اق سلعاشقى وندىققا يرلانديا، فرانسيا، يسپانيا، جاڭا زەلانديا، ۇلىبريتانيا، نيدەرلاند جانە كاتار ەنگەن.
سونىمەن قاتار افريكا، وڭتۇستىك ازيا جانە ءبىرقاتار پوستكەڭەستىك ەلدەردىڭ كوپشىلىگى 10 پايىزدان تومەن كورسەتكىشپەن رەيتينگتىڭ تومەنگى بولىگىندە قالىپ وتىر. Microsoft باعالاۋىنشا، جەر شارى حالقىنىڭ شامامەن جارتىسى جاساندى ينتەللەكتىنى پايدالانۋ ءۇشىن قاجەتتى ينفراقۇرىلىمعا ءالى دە تولىق قول جەتكىزە الماي وتىر.
قۇجاتتا ءجي-دىڭ تارالۋى حالىق تابىسىنىڭ دەڭگەيىمەن عانا ەمەس، مەملەكەتتىك سيفرلاندىرۋ باعدارلامالارىنا، بىلىمگە سالىنعان ينۆەستيسياعا، ستارتاپ-ەكوجۇيەلەردىڭ دامۋىنا جانە دەرەكتەردى رەتتەۋ ساياساتىنا دا تىكەلەي بايلانىستى ەكەنى اتالعان. بۇل فاكتورلار جۇيەلى تۇردە دامىعان ەلدەردە جاساندى ينتەللەكت ەكونوميكا، ءبىلىم بەرۋ، مەديسينا جانە مەملەكەتتىك باسقارۋ سالالارىندا جاپپاي قولدانىلاتىن قۇرالعا اينالىپ كەلەدى.
