قازاقستاندىق ساياساتتانۋشى عازيز ابىشيەۆ رەسەيلىك ناسيحاتشى ۆلاديمير ءسولوۆوۆتىڭ داۋلى مالىمدەمەسىنە قاتىستى پىكىر ءبىلدىردى، دەپ حابارلايدى Dalanews.kz.
بۇعان دەيىن رەسەيلىك تەلەجۇرگىزۋشى ورتالىق ازيا مەن كاۆكازدى رەسەيدىڭ "ىقپالدى اۋماعى" رەتىندە اتاپ، قاجەت بولعان جاعدايدا اتالعان وڭىرلەرگە قارسى حالىقارالىق قۇقىقتى ەلەمەي، اسكەري كۇش قولدانۋعا بولاتىنىن اشىق تۇردە مەڭزەگەن ەدى.
"بۇل مالىمدەمە كرەملدىڭ اقش-تىڭ ۆەنەسۋەلاعا قاتىستى ارەكەتتەرىنە جاناما رەاكسياسى ما، الدە ورتالىق ازيا مەن كاۆكاز ەلدەرىنە باعىتتالعان ەسكەرتۋ مە، نە بولماسا ءسولوۆوۆتىڭ جەكە ساياسي دەمارشى ما - ايتۋ قيىن. مۇنىڭ ءبارى قاتار كەلگەن بولۋى دا مۇمكىن"، - دەدى عازيز ابىشيەۆ.
ونىڭ پىكىرىنشە، مۇنداي سەبەپسىز ءارى جاريا سيپاتتاعى مالىمدەمەلەر وداقتاس ەلدەرگە قاتىستى مەملەكەتارالىق قارىم-قاتىناس ادەبىنىڭ بۇزىلۋى رەتىندە باعالانۋى ءتيىس.
"ءبىر نارسەنى ناقتى اجىراتا ءبىلۋ كەرەك. ءوز ەلىڭنىڭ گەوساياسي مۇددەلەرىن اشىق ايتۋ - قالىپتى جاعداي. ال كورشى مەملەكەتتەرمەن ىقتيمال اسكەري قاقتىعىسقا قوعامدى الدىن الا دايىنداۋ مۇلدە باسقا ماسەلە"، - دەپ اتاپ ءوتتى ساياساتتانۋشى.
سونداي-اق ابىشيەۆ وشپەندىلىككە نەگىزدەلگەن مۇنداي ريتوريكانىڭ ناقتى سالدارى بار ەكەنىن ەسكەرتتى. ونىڭ سوزىنشە، ءدال وسىنداي مالىمدەمەلەردەن كەيىن قازاقستان سەكىلدى ەلدەردىڭ كوپۆەكتورلى ساياسات ۇستانىپ، جۇڭگو، تۇركيا جانە وزگە مەملەكەتتەرمەن، ونىڭ ىشىندە اسكەري ىنتىماقتاستىقتى دامىتۋى كەيبىر ورتادا تەرىس قابىلدانا باستايدى.
"سودان سوڭ "ولار بىزگە قارسى بىردەڭە ويلاستىرىپ جاتىر ما، نەگە باسقا ەلدەرمەن جاقىنداسادى، نەگە قارۋ الادى، نەگە بىرلەسكەن جاتتىعۋلار وتكىزەدى" دەگەن ورىنسىز كۇدىك تۋىندايدى. ال مۇنداي كوزقاراستىڭ قايدان شىققانىنا ءمان بەرىلمەي جاتادى"، — دەدى ول.
سوۆوليەۆتىڭ مالىمدەمەسى
ەسكە سالايىق، بۇعان دەيىن رەسەيلىك ناسيحاتشى ۆلاديمير ءسولوۆوۆ ماسكەۋ "ارنايى اسكەري وپەراسيانى" تەك ۋكراينادا ەمەس، پوستكەڭەستىك كەڭىستىكتەگى وزگە ەلدەردە دە باستاۋى مۇمكىن ەكەنىن مالىمدەگەن ەدى.
ونىڭ ايتۋىنشا، رەسەي ءۇشىن ەڭ ءقاۋىپتى ايماقتار - ارمەنيا مەن ورتالىق ازيا مەملەكەتتەرى. ءسولوۆوۆ بۇل باعىتتار ۇلتتىق قاۋىپسىزدىك تۇرعىسىنان سيريا نەمەسە ۆەنەسۋەلاداعى جاعدايدان الدەقايدا ماڭىزدى ەكەنىن ايتتى.
"ارمەنيادان ايىرىلۋ - اسا ۇلكەن ماسەلە. ازياداعى، ناقتىراق ايتقاندا وزدەرى ورتالىق ازيا دەپ اتايتىن وڭىردەگى تۇيتكىلدەر - ءبىز ءۇشىن اۋقىمدى قاتەر. سوندىقتان ماقساتتارىمىز بەن مىندەتتەرىمىزدى اشىق ءارى ناقتى ايقىنداۋ قاجەت. “ويىن اياقتالدى” دەپ تۋرا ايتۋ كەرەك. حالىقارالىق قۇقىق پەن حالىقارالىق تارتىپكە سۇيەنۋدىڭ قاجەتى جوق. ەگەر ۇلتتىق قاۋىپسىزدىگىمىز ءۇشىن ۋكراينادا ارنايى اسكەري وپەراسيا باستاۋعا ءماجبۇر بولساق، ءدال وسى ۋاجبەن ءوزىمىز ىقپال ايماعى دەپ سانايتىن باسقا وڭىرلەردە دە وسىنداي قادامعا بارۋعا نە كەدەرگى؟"، - دەگەن ەدى ول.
