Almatydaǵy úsh adamnyń ómirin qıǵan jol apatyna qatysty jańa málimetter belgili boldy. Jýrnalıs Mıhaıl Kozachkovtyń málimetinshe, Zeekr 9X kóligin 32 jastaǵy kólik salasynda jumys isteıtin kásipker basqarǵan, dep habarlaıdy Dalanews.kz.
Jýrnalısiń jazýynsha, qaıǵyly oqıǵa 21 naýryz kúni Almatydaǵy Ál-Farabı dańǵylynda bolǵan. 009JET memlekettik nómirli Zeekr kóligi qarsy jolaqqa shyǵyp ketip, Mercedes avtokóligimen betpe-bet soqtyǵysqan.
Soqtyǵys saldarynan jeńil kólikte bolǵan úsh adam – 29 jastaǵy júrgizýshi jáne 20 jáne 22 jastaǵy eki jolaýshy qyz qaza tapty. Al jol talǵamaıtyn kólikti basqarǵan er adam aýyr jaraqat alǵan: onyń qabyrǵalary, jambas súıegi jáne oń aıaǵy synǵan.
Mıhaıl Kozachkovtyń aıtýynsha, oǵan oqıǵaǵa qatysty anyqtama da jiberilgen.
Qujattaǵy málimetke sáıkes, Zeekr kóliginiń júrgizýshisi – Almatynyń joǵary bóliginde turatyn 32 jastaǵy Aleksandr Pak. Onyń atyna eki kompanıa tirkelgen: «GÝ HOZÝ Almaty» jáne «Global Partner» JSHS. Ol eki uıymnyń da quryltaıshysy.
Birinshi kompanıa 2025 jyly ǵana tirkelip, bir jyl ishinde shamamen 500 myń teńge salyq tólegen. Al ekinshi kompanıa – «Global Partner» – 2024 jyldyń kúzinen beri búdjetke 50 mıllıon teńgeden astam salyq aýdarǵan. Bul kásiporynnyń aınalymy edáýir joǵary ekeni baıqalady. Sarapshylardyń aıtýynsha, Zeekr 9X avtokóliginiń quny shamamen 100 myń dollar.
Jýrnalısiń pikirinshe, kúdiktiniń qarjylyq múmkindigi onyń jaýapkershilikten jaltarýyna negiz bolmaýy tıis. Ol kináli adam mindetti túrde sot aldynda jaýap berip, jaza alady dep esepteıdi. Qoldanystaǵy zańnamaǵa sáıkes, Qylmystyq kodekstiń 345-babynyń 4-bóligi boıynsha 5 jyldan 10 jylǵa deıin bas bostandyǵynan aıyrý jazasy qarastyrylǵan.
Alaıda bul iste mańyzdy jaıt bar. Kýágerlerdiń aıtýynsha, qaıǵyly túnde Zeekr 9X basqa kólikpen jarysqan bolýy múmkin.
Jýrnalıs mundaı jaǵdaılarda birqatar elderde jaza áldeqaıda qatań ekenin atap ótti. Mysaly, Reseıde osyndaı quqyqbuzýshylyq úshin 15 jylǵa deıin, AQSH-ta 20 jyldan astam, al Germanıada keı jaǵdaılarda ómir boıyna bas bostandyǵynan aıyrý jazasy taǵaıyndalady.
Onyń pikirinshe, Qazaqstan zańnamasynda da osyndaı jaǵdaılarǵa qatysty jaýapkershilikti kúsheıtý máselesin qarastyrý qajet.
