2025 jyldyń shildesinde engizilgen dárilik zattardy tańbalaý júıesi elde birqatar zańbuzýshylyqty áshkereledi. Bul týraly Densaýlyq saqtaý mınıstrligi málimdedi, dep habarlaıdy Dalanews.kz.
Atap aıtqanda, júıe tegin medısınalyq kómektiń kepildendirilgen kólemi (TMKKK) aıasynda halyqqa tegin taratylýy tıis dárilerdiń komersıalyq naryqta satylǵanyn, tańbalaý kodtarynyń qaıta qoldanylǵanyn jáne jaramdylyq merzimi ótip ketken preparattardyń saýdaǵa shyǵarylǵanyn anyqtaǵan.
Taýarlardy tańbalaý jáne qadaǵalaý jónindegi biryńǵaı operatordyń málimetinshe, memleket qarjysyna satyp alynyp, halyqqa tegin berilýi tıis 15 myńnan astam dári-dármek birligi satylǵany tirkelgen. Sondaı-aq 6,5 myńnan astam tańbalaý kody qaıta paıdalanylyp, jalpy sany 385 myńnan asa zańbuzýshylyq faktisi anyqtaldy. Budan bólek, jaramdylyq merzimi ótip ketken 750-den astam dári qaptamasynyń satylǵany belgili boldy.
Vedomstvonyń habarlaýynsha, mınıstr vıse-mınıstrler men qurylymdyq bólimshelerge dári aınalymyn tolyq tártipke keltirý úshin tańbalaý jáne qadaǵalaý júıesiniń analıtıkalyq platformasyn kúndelikti jumysta qoldanýdy tapsyrdy. Sonymen qatar búdjet qarajatynyń tıimdi jumsalýyn qamtamasyz etý úshin dárilerdiń maqsatsyz paıdalanylýyn qatań baqylaý mindetteldi.
