بۇگىن «دالا قىراندارى» جاستار قوعامدىق بىرلەستىگىنىڭ شتاب-پاتەرىندە تۋريزم جانە سپورت ءمينيسترى ەربول مىرزابوسىنوۆتىڭ قاتىسۋىمەن دوڭگەلەك ۇستەل فورماتىندا جۇمىس كەزدەسۋى ءوتتى، دەپ حابارلايدى Dala News.
كەزدەسۋ قولدانىستاعى ىنتىماقتاستىق مەموراندۋمى اياسىندا ۇيىمداستىرىلىپ، ەلدە ءجۇرىپ جاتقان كونستيتۋسيالىق رەفورما ماسەلەلەرىنە ارنالدى. جيىنعا بىرلەستىكتىڭ بەلسەندىلەرى مەن ۇيلەستىرۋشىلەرى قاتىسىپ، ازاماتتىق قوعامنىڭ جاڭا كونستيتۋسيا جوباسىن تالقىلاۋعا تىكەلەي ارالاسۋى ماڭىزدى ەكەنىن اتاپ ءوتتى.
«دالا قىراندارى» قوزعالىسىنىڭ ۇيلەستىرۋشىسى مادي رىمجانوۆتىڭ ايتۋىنشا، ۇيىم سوڭعى ەكى جىل بويى كونستيتۋسيانىڭ 36.1-بابى اياسىندا جۇيەلى جۇمىس جۇرگىزىپ كەلەدى.
«بۇل قولدانىستاعى كونستيتۋسيانىڭ 36.1-بابى. وندا قازاقستان رەسپۋبليكاسىن قورعاۋ ءاربىر ازاماتتىڭ قاسيەتتى بورىشى ەكەنى جازىلعان. ءبىز ءوزىمىزدى ەڭ الدىمەن پاتريوت ءارى ەلىمىزدىڭ قورعاۋشىسى دەپ سانايمىز. مەملەكەت باسشىسى جاڭا كونستيتۋسيا جوباسىن تالقىلاۋعا قوعام بەلسەندى قاتىسۋى كەرەك ەكەنىن ايتتى. بۇل جاستار ءۇشىن ءوز ۇسىنىستارىن ەنگىزۋگە بەرىلگەن ۇلكەن مۇمكىندىك. سول سەبەپتى ءبىز تۋريزم جانە سپورت ءمينيسترىن شاقىرىپ، ءوز باستامالارىمىزدى تالقىلادىق. اتاپ ايتقاندا، مەملەكەتتىڭ جانە قوعامنىڭ مەملەكەتتىك رامىزدەردى قورعاۋداعى ۇستانىمىن كۇشەيتۋ، ولاردىڭ مارتەبەسىن ارتتىرۋ جونىندە ۇسىنىستار ايتتىق. جاڭا كونستيتۋسيا جوباسىندا مەملەكەتكە رامىزدەردىڭ بەدەلىن كوتەرۋ جونىندەگى جاۋاپكەرشىلىك پەن ءرول ناقتى بەكىتىلۋى ءتيىس دەپ ەسەپتەيمىز. بۇل باعىتتا بىزدە ناقتى ۇسىنىستار بار»، – دەدى مادي رىمجانوۆ.
كەزدەسۋ بارىسىندا قوزعالىس وكىلدەرى ءوز ۇسىنىستارىن ناقتى قوعامدىق تاجىريبەگە سۇيەنە وتىرىپ جەتكىزدى. ۇيىم ۇيلەستىرۋشىسى مەيربولات تويتوۆ مەملەكەتتىك رامىزدەردى قورعاۋ تەتىكتەرى بۇگىندە جەتكىلىكسىز ەكەنىن ايتتى.
«36.1 باعىتى بويىنشا ەكى جىلدىق تاجىريبەمىزگە سۇيەنە وتىرىپ، مەملەكەتتىك رامىزدەردى قورعاۋعا قاتىستى قولدانىستاعى شارالار، وكىنىشكە قاراي، تولىق ناتيجە بەرمەي وتىرعانىن سەنىمدى تۇردە ايتا الامىز. رامىزدەرگە دەگەن قۇرمەتسىزدىك جەكەلەگەن جاعداي ەمەس، جۇيەلى ءارى ءجيى كەزدەسەتىن قۇبىلىسقا اينالدى. ءبىز مۇنداي فاكتىلەرمەن كۇن سايىن دەرلىك بەتپە-بەت كەلەمىز»، – دەدى مەيربولات تويتوۆ.
وسىعان بايلانىستى «دالا قىراندارى» كونستيتۋسيانىڭ 9-بابىن كۇشەيتۋدى ۇسىنىپ وتىر. اتاپ ايتقاندا، مەملەكەتتىك رامىزدەردى قۇرمەتتەۋ مەن قورعاۋ نورمالارىن كونستيتۋسيالىق دەڭگەيدە بەكىتۋ، سونداي-اق مەملەكەتكە ءبىلىم بەرۋ، مادەنيەت جانە ب ا ق ارقىلى رامىزدەرگە قۇرمەتتى كوزقاراس قالىپتاستىرۋ مىندەتىن جۇكتەۋ قاجەت دەپ سانايدى.
ءوز كەزەگىندە تۋريزم جانە سپورت ءمينيسترى ەربول مىرزابوسىنوۆ ازاماتتىق ۇيىمدارمەن اشىق ديالوگتىڭ ماڭىزىن اتاپ ءوتىپ، ۇسىنىستاردىڭ وزەكتىلىگىنە توقتالدى.
«دالا قىراندارى» قوزعالىسىنىڭ ەل ىشىندەگى تانىمالدىعى كۇن سايىن ارتىپ كەلەدى. قازىرگى تاڭدا قازاقستاندا اۋقىمدى وزگەرىستەر مەن كونستيتۋسيالىق رەفورمالار ءجۇرىپ جاتىر، سوندىقتان مەملەكەت ءۇشىن وسىنداي ۇيىمدارمەن اشىق ديالوگ جۇرگىزۋ وتە ماڭىزدى. قازىرگى قوعامعا زامان تالابىنا ساي ەرەجەلەر قاجەت. بۇل – ساياسي ايتىس ەمەس، ۋاقىت تالابىنا ساي نەگىزگى نورمالاردى جاڭارتۋ ماسەلەسى. قوعامدىق ۇيىمدار مەن مەملەكەت ءبىر تىلدە سويلەگەن كەزدە، ناتيجە ناقتى ىستەرمەن كورىنۋى ءتيىس»، – دەپ اتاپ ءوتتى مينيستر.
كەزدەسۋ قورىتىندىسى بويىنشا «دالا قىراندارى» ازىرلەگەن ۇسىنىستار كونستيتۋسيالىق كوميسسيانىڭ قاراۋىنا جولداناتىن بولدى.
