قازاقستاندا وتاندىق تاۋار وندىرۋشىلەردى قولداۋعا باعىتتالعان جاڭا باستاما ازىرلەندى، دەپ حابارلايدى Dala News.
ساۋدا جانە ينتەگراسيا مينيسترلىگى ساۋدا جەلىلەرىندە قازاقستاندىق جاڭا برەندتەرگە جەڭىلدەتىلگەن شارتتارمەن ورىن بەرۋ تەتىگىن كوزدەيتىن تۇزەتۋلەر جوباسىن دايىندادى. قۇجاتقا سايكەس، تاۋار وندىرۋشىلەر تىزىلىمىنە ەنگىزىلگەن جاڭا وتاندىق برەندتەر ءوز ءونىمىن دۇكەن سورەلەرىنە كەمىندە ءۇش اي مەرزىمگە جەڭىلدىكپەن ورنالاستىرا الادى. ول ءۇشىن ءوندىرۋشى تاراپىنان جازباشا ءوتىنىم بەرۋ جەتكىلىكتى.
سونىمەن قاتار، جاڭا ەرەجەلەر ساۋدا سۋبەكتىلەرىنە جابدىقتاردى، تاۋارلار مەن شيكىزاتتى وتاندىق كاسىپكەرلەردەن ساتىپ الۋ تالابىن بەكىتۋدى قاراستىرادى. بۇل ىشكى ءوندىرىستىڭ جۇكتەمەسىن ارتتىرىپ، جەرگىلىكتى بيزنەستىڭ نارىقتاعى ۇلەسىن كەڭەيتۋگە مۇمكىندىك بەرمەك.
تۇزەتۋلەر جوباسىندا تاعى ءبىر ماڭىزدى شەكتەۋ ەنگىزىلەدى. سۋبسيديالاۋ جانە كرەديتتەردى كەپىلدەندىرۋ تۋرالى شارت جاسالعاننان كەيىن ءبىر جىل ىشىندە جالداۋ اقىسىن وسىرۋگە تىيىم سالۋ ۇسىنىلىپ وتىر. بۇل شارا كاسىپكەرلەردى كۇتپەگەن شىعىنداردان قورعاۋعا باعىتتالعان.
قۇجات 2026 جىلعى 20 اقپانعا دەيىن قوعامدىق تالقىلاۋعا شىعارىلدى. مينيسترلىكتىڭ مالىمەتىنشە، ۇسىنىستار مەن ەسكەرتپەلەر ەسكەرىلگەننەن كەيىن تۇپكىلىكتى شەشىم قابىلدانادى.
