قارجى ۆيسە-مينيسترى داۋرەن كەڭبەيىل سوت شەشىمىن ورىنداماعانى ءۇشىن ايىپپۇل ارقالادى، دەپ حابارلايدى Dalanews.kz.

Protenge تەلەگرام ارناسىنىڭ مالىمەتىنشە، اكىمشىلىك سوت ۆيسە-مينيسترگە 78 640 تەڭگە جانە 196 600 تەڭگە كولەمىندە ايىپپۇل سالعان. داۋدىڭ باستالۋىنا مەملەكەتتىك ساتىپ الۋ كونكۋرسىنا قاتىستى كەلىسپەۋشىلىك سەبەپ بولعان. كونكۋرس قۇجاتتارىمەن كەلىسپەگەن الەۋەتتى جەتكىزۋشى سوتقا جۇگىنىپ، ءىس جارتى جىلدان استام ۋاقىت قارالعان. ناتيجەسىندە سوت كاسىپكەردىڭ ءۋاجىن قولداپ، قارجى مينيسترلىگىنە مۇنداي زاڭبۇزۋشىلىقتاردى قايتالاماۋ جونىندە جەكە قاۋلى جولداعان.

مۇنداي جاعدايدا سوت مەملەكەتتىك ورگاننان ناقتى شارا قابىلداپ، اتقارىلعان جۇمىستار تۋرالى ەسەپ بەرۋدى تالاپ ەتەدى. الايدا بەلگىلەنگەن مەرزىمدە سوتقا ەسەپ ۇسىنىلماعان. وسىنى سوت شەشىمىن ورىنداماۋ ءارى سوتقا قۇرمەتسىزدىك رەتىندە باعالاعان اكىمشىلىك سوت ۆيسە-مينيستردەن تۇسىنىكتەمە تالاپ ەتكەن. ناقتى جاۋاپ بولماعاندىقتان، وعان 20 جانە 50 ايلىق ەسەپتىك كورسەتكىش كولەمىندە ايىپپۇل سالىندى.

قاڭتار ايىنىڭ سوڭىندا داۋرەن كەڭبەيىل ايىپپۇلداردى داۋلاۋعا تىرىسقانىمەن، سوت ونىڭ ۋاجدەرىن قاناعاتتاندىرمادى. سەبەبى شاعىمدى مينيسترلىكتىڭ مۇددەسىن قورعايتىن زاڭگەر بەرگەن، ال ايىپپۇل ۆيسە-مينيستردىڭ وزىنە جەكە تۇلعا رەتىندە سالىنعان. سوت ايىپپۇلدى تولەۋ مىندەتىن كۇشىندە قالدىردى.

وسىلايشا، ۆيسە-مينيستر مەملەكەت بيۋدجەتىنە 275 مىڭ تەڭگەدەن استام ايىپپۇل تولەۋگە ءتيىس. بۇل جاعداي كاسىپكەردىڭ ءوز قۇقىعىن سوت ارقىلى قورعاۋىنان باستالعان داۋدىڭ ناقتى سالدارى بولدى.