تاتنەفت قازاقستان اۋماعىندا جۇزەگە اسىرىلۋى ءتيىس بولعان «بۋتاديەن» جوباسىنا قاتىسۋدان شىققان، دەپ حابارلايدى Dalanews.kz.
Petro council مالىمەتىنشە، قۇنى شامامەن 1 ملرد اقش دوللار بولاتىن بۇل جوبا اتىراۋ وبلىسى اۋماعىندا بۋتاديەن جانە سونىڭ نەگىزىندە وندىرىلەتىن ونىمدەرگە ارنالعان ءىرى مۇناي-حيميا كەشەنىن سالۋدى كوزدەگەن. جوبا جوعارى قوسىلعان قۇنى بار مۇناي-حيميا ونىمدەرىن دامىتۋداعى ستراتەگيالىق باستامالاردىڭ ءبىرى رەتىندە قاراستىرىلعان.
باستاپقى كەزەڭدە جوبا بىرلەسكەن كاسىپورىن فورماتىندا جۇزەگە اسىرىلىپ، ونىڭ 75 پايىزى «تاتنەفتكە»، ال 25 پايىزى قازاقستاندىق تاراپقا تيەسىلى بولعان.
بۇعان دەيىن، وتكەن جىلدىڭ جەلتوقسان ايىندا، EPC-مەردىگەردى انىقتاۋ جوسپارلانعان ەدى. بۇل جوبانىڭ بەلسەندى ىسكە اسىرۋ كەزەڭىنە ءوتۋىن ءبىلدىرۋى ءتيىس بولاتىن. الايدا قازىرگى تاڭدا نەگىزگى ستراتەگيالىق سەرىكتەستىڭ جوبادان شىققانى بەلگىلى بولىپ وتىر. بۇل جاعداي جوبانىڭ ءارى قارايعى مەرزىمىنە دە، ونى جۇزەگە اسىرۋ فورماتىنا دا تىكەلەي اسەر ەتۋى مۇمكىن.
