Ulynan aıyrylǵan Danıar Talıpov emge jınalǵan aqshany basqa naýqas balalarǵa aýdarǵan, dep habarlaıdy Dalanews.kz.

Danıar Talıpov uly Áltaır Erkebulan qaıtys bolǵannan keıin jeti kún ótken soń kópshilikke ún qatyp, qoǵamda keń rezonans týdyrǵan sheshim qabyldaǵanyn málimdedi.

Áltaırdiń emine jınalǵan, paıdalanylmaı qalǵan barlyq qarajat otbasynyń sheshimimen shuǵyl emdeýdi qajet etip otyrǵan ózge balalarǵa baǵyttalǵan. Bul týraly Danıar Instagram paraqshasynda jarıalaǵan beıneúndeýinde aıtty.

Áńgime beıjaı qaramaǵan jandar balanyń ómiri úshin kúreske jınaǵan 96 mıllıon teńge týraly bolyp otyr. Ulynan aıyrylǵannan keıin otbasy bul qarajatty qazir de qaıyrymdylyq kómegine muqtaj balalardyń arasynda bólip berýdi uıǵarǵan.

«Onyń aramyzdan ketkenine jeti kún ótti. Áltaırdiń emine jınalǵan 96 mıllıon teńge qarajat qaldy. Biz bul somany qazir kómekke muqtaj balalardyń arasynda bólýdi jón kórdik», – dedi Danıar Talıpov.

Onyń aıtýynsha, eń iri somany Aıana Nurtaevaǵa aýdarylǵan.

«Aıana Nurtaevaǵa 45 mıllıon teńge jiberdik. Ol qazir Ystambulda em qabyldap jatyr», – dedi ol.

Taǵy 25 mıllıon teńge Almaz Túsipbektiń emine baǵyttalǵan.

«Almazǵa da 25 mıllıon teńge aýdardyq. Qarajattyń taǵy bir bóligi Dará esimdi balaǵa jiberildi – olar da qazir em alyp jatyr», – dep naqtylady Danıar.

Ol kómek alǵan ózge balalardyń da qazirgi ýaqytta klınıkalarda emin jalǵastyryp jatqanyn qosty.

Beıneúndeýinde Danıar Talıpov otbasy úshin eń aýyr kezeńde qoldaý bildirgen barsha janǵa alǵysyn aıtty.

«Dostar, qoldaýlaryńyz úshin – qarjylaı kómekterińizge, janashyrlyqtaryńyzǵa, pikirlerińizge – barshańyzǵa úlken raqmet. Bul biz úshin óte mańyzdy boldy», – dedi ol.

Sondaı-aq ol qıyn sátte kómek kórsetken bankke jáne jekelegen adamdarǵa arnaıy alǵys bildirdi.

Ol úndeýin otbasynyń janynan tabylǵan barsha adamǵa alǵys aıtyp, barlyǵyna jaqsylyq tileýmen aıaqtady.