Mádenıet jáne aqparat vıse-mınıstri Evgenıı Kochetov Qazaqstanda sheteldik ártisterdiń konsertteri qandaı jaǵdaıda toqtatylýy nemese tyıym salynýy múmkin ekenin túsindirdi, dep habarlaıdy Dalanews.kz.

Onyń aıtýynsha, bul senzýra da emes, «qara tizimder» de emes. Qazaqstan sheteldik oryndaýshylar úshin ashyq el bolyp qala beredi, sóz bostandyǵy saqtalady. Alaıda konsert uıymdastyrý tártibi ózgeredi.

Buǵan deıin ártister nemese olardyń komandalary aldymen alań taýyp, bılet satýdy bastap, tek sodan keıin ǵana qujattardy rásimdeýge kirisetin. Sonyń saldarynan ákimdikter men tıisti vedomstvolar konsertter týraly kóbine keıin bilip jatatyn, bıletter satylyp ketken soń, áleýmettik jelilerden kóretin. Kochetov mundaı tájirıbeni durys emes dep atady.

Endi jańa tártip engiziledi. Aldymen resmı kelisimshart jasalady, keıin jergilikti bılikpen kelisý júrgiziledi, tek sodan soń ǵana bılet satylymy bastalady. Osylaısha memlekettik organdar kim keletinin, qandaı baǵdarlamamen jáne qandaı sharttarmen óner kórsetetinin aldyn ala biletin bolady.

Kelisimsharttarda ártistiń mindettemeleri naqty kórsetiledi. Eń bastysy, konsert barysynda el zańdaryn buzatyn kontent bolmaýy tıis: esirtkini nasıhattaý, pornografıa, memlekettik qurylymǵa qarsy úndeýler nemese ózge de tyıym salynǵan taqyryptar.

Eger repertýarda daýly shyǵarmalar bolsa, ártiske olardy Qazaqstan sahnasynda oryndamaý jóninde usynys beriledi. Osy talaptar saqtalǵan jaǵdaıda konsert ótkizýge eshqandaı kedergi bolmaıdy.