تۇركىستان وبلىسى ساۋران اۋدانىندا ورنالاسقان سەرت اۋىلىندا كەيىنگى 5 جىلدان بەرى بىردە-بىر قىلمىس تىركەلمەگەن، دەپ حابارلايدى Dalanews.kz.
بۇل - تۇرعىنداردىڭ اۋىزبىرشىلىگى، ءوزارا قۇرمەتى جانە جوعارى ازاماتتىق جاۋاپكەرشىلىگىنىڭ ناتيجەسى. اۋىلدا 900-گە جۋىق ادام تۇرادى. مۇندا قۇقىق بۇزۋشىلىقتىڭ الدىن الۋ، وتباسى قۇندىلىقتارىن نىعايتۋ جانە جاس ۇرپاقتى تاربيەلەۋ ماسەلەسىنە ەرەكشە كوڭىل بولىنەدى. ۋچاسكەلىك پوليسيا ينسپەكتورى تۇرعىندارمەن تىعىز بايلانىستا جۇمىس ىستەپ، تۇراقتى تۇردە پروفيلاكتيكالىق ءىس-شارالار وتكىزەدى.
اشىق ديالوگ پەن سەنىم قوعامدىق ءتارتىپتىڭ ساقتالۋىنا نەگىز بولىپ وتىر. سەرت تۇرعىندارى ەڭبەككە، سپورتقا، ۇلتتىق ءداستۇردى دارىپتەۋگە باسىمدىق بەرەدى. جاستار ۇلكەندەردەن ونەگە الىپ، سىيلاستىق پەن جاۋاپكەرشىلىككە نەگىزدەلگەن ورتادا ءوسىپ كەلەدى.
ىشىمدىكتەن باس تارتقان سەرت اۋىلى — بىرلىك پەن ورتاق جاۋاپكەرشىلىك ءقاۋىپسىز ءارى بەرەكەلى قوعام قالىپتاستىرا الاتىنىن دالەلدەگەن اۋىل.
