اقمولا وبلىسىنىڭ زەرەندى اۋدانىنداعى ايدابۇلكا وزەنىندە بالىقتىڭ قىرىلۋى تۋرالى الەۋمەتتىك جەلىدە جاريالانعان اقپاراتتان كەيىن «ايدابۇل سپيرت زاۋىتى» اق-قا قاتىستى جوسپاردان تىس تەكسەرىس جۇرگىزىلدى، دەپ حابارلايدى Dala news.
وبلىستىق ەكولوگيا دەپارتامەنتىنىڭ مالىمەتىنشە، تەكسەرىس بارىسىندا كاسىپورىن اۋماعىندا وندىرىستىك نىسانداردان ايدابۇلكا وزەنىنە قاراي باعىتتالعان قۇبىر انىقتالعان. اتالعان قۇبىر ارقىلى جىلۋ الماستىرعىشتاردان شىققان اعىندى سۋ رۇقساتسىز توگىلگەن.
كاسىپورىن وكىلدەرىنىڭ تۇسىندىرۋىنشە، توگىندى ىسىرمانىڭ تولىق جابىلماۋى سالدارىنان بولعان.
زەرتحانالىق تالداۋ ناتيجەسىندە توگىندى ورنىنان الىنعان سۋ سىنامالارىندا لاستاۋشى زاتتاردىڭ شەكتى رۇقسات ەتىلگەن كونسەنتراسياسىنان اسۋى تىركەلگەن. بۇل سۋ نىسانىنىڭ لاستانعانىن راستادى.
سونداي-اق كاسىپورىننىڭ اينالىمداعى سۋ توعانىنا توگىلەتىن اعىندى سۋلار دا تەكسەرىلدى. ناتيجەسىندە ورگانيكالىق ازوتقۇرامدى زاتتار بويىنشا شەكتى مولشەردەن اسۋ فاكتىلەرى انىقتالعان. بۇل لاستانۋ كاسىپورىننىڭ شارۋاشىلىق قىزمەتىمەن بايلانىستى ەكەنى كورسەتىلدى.
تەكسەرۋ قورىتىندىسى بويىنشا كاسىپورىنعا 21،3 ملن تەڭگە كولەمىندە اكىمشىلىك ايىپپۇل سالىندى.
بۇدان بولەك، انىقتالعان زاڭبۇزۋشىلىقتاردى جويۋ جونىندە نۇسقاما بەرىلدى. وندا:
•تەحنيكالىق ءىس-شارالار جوسپارىن ازىرلەۋ جانە ىسكە اسىرۋ؛
•قورشاعان ورتانىڭ لاستانۋىنا جول بەرمەۋ شارالارىن قابىلداۋ؛
•وزەنگە قايتا لاستانۋ ءقاۋپىن بولدىرماۋ ءۇشىن قۇبىردى دەمونتاجداۋ تالاپتارى قامتىلعان.
ەكولوگيالىق زاڭناما تالاپتارىنىڭ ورىندالۋى جانە بەرىلگەن نۇسقامانىڭ جۇزەگە اسىرىلۋى تۇراقتى باقىلاۋدا بولادى.
