اقتوبەدە بوكەنباي باتىر كوشەسىندەگى جاڭادان اشىلعان «انۆار» گيپەرماركەتى الدىندا رەفەرەندۋمدى قولداۋعا ارنالعان جاستار فەستيۆالى ۇيىمداستىرىلدى. اشىق اسپان استىندا وتكەن مەرەكەلىك كەش قالا تۇرعىندارىنا ساياسي ناۋقاندى ءاقپاراتتىق-تۇسىندىرۋ فورماتىندا جالعاستى، دەپ حابارلايدى Dalanews.kz.
ءىس-شارانى قالا جاستارى ۇيىمداستىرعان. ساحنادا وقۋ ورىندارىنىڭ ءبىلىم الۋشىلارى مەن ونەر ۇجىمدارى ونەر كورسەتتى. جينالعان قاۋىمعا وبلىستىق كواليسيا مۇشەلەرى جاڭا كونستيتۋسيا جوباسىنىڭ نەگىزگى باعىتتارىن ءتۇسىندىرىپ، 15 ناۋرىزدا وتەتىن رەسپۋبليكالىق رەفەرەندۋمعا بەلسەندى قاتىسۋعا شاقىردى.
وبلىستىق ءماسليحات دەپۋتاتى ايگۇل نۇركەيەۆا رەفەرەندۋمدى تاريحي كەزەڭ دەپ اتاپ ءوتتى. ونىڭ ايتۋىنشا، كونستيتۋسيا – مەملەكەتتىڭ تىرەگى ءارى بولاشاق ۇرپاقتىڭ تاعدىرىنا اسەر ەتەتىن باستى قۇجات.
«ءبىز بۇگىن تاريحي كەزەڭنىڭ كۋاسى بولىپ تۇرمىز. كونستيتۋسيا — مەملەكەتىمىزدىڭ تىرەگى، بولاشاق ۇرپاقتىڭ تاعدىرىنا تىكەلەي اسەر ەتەتىن باستى قۇجات. قابىلداناتىن وزگەرىستەر ادىلەتتى، پروگرەسسيۆتى قازاقستاندى قالىپتاستىرۋعا باعىتتالعان. بارشاڭىزدى رەفەرەندۋمعا كەلىپ، داۋىس بەرۋگە شاقىرامىن. بولاشاعىمىز ءۇشىن بىرگە شەشىم قابىلدايىق!»، — دەدى وبلىستىق ءماسليحات دەپۋپاتى ايگۇل نۇركەيەۆا.
«جاستار رۋحى» جاستار قاناتى وبلىستىق فيليالىنىڭ ءتوراعاسى الىشەر تىنىشتىق ەلدەگى تۇراقتىلىق پەن رەفورمالاردىڭ ناتيجەسىنە توقتالدى.
«بۇل وزگەرىستەر — پرەزيدەنت قاسىم-جومارت توقايەۆتىڭ ادىلەتتى قوعام قۇرۋعا جانە جاستاردى قولداۋعا باعىتتالعان ساياساتىنىڭ ناتيجەسى. جاڭا كونستيتۋسيا — جاي قۇجات ەمەس، بىلىمگە، عىلىمعا جانە يننوۆاسياعا اشىلعان كەڭ جول. بۇل — ءار جاسقا بەرىلگەن ناقتى مۇمكىندىك. رەفەرەندۋم — «مەن ەلىممەن بىرگەمىن!» دەپ ايتاتىن شەشۋشى ءسات. 15 ناۋرىز — ءار ادام داۋىس بەرۋ ارقىلى ەل تاريحىن ايقىندايتىن كۇن. ءبىز تاڭداۋ جاسايمىز جانە بولاشاقتى بىرگە قۇرامىز!»، — دەدى ول.
سونداي-اق «انۆار» ساۋدا جەلىسىنىڭ ديرەكتورى اسلان قايىرعالييەۆ تە ءوز پىكىرىن ءبىلدىردى. ول جاڭا جوبادا ازاماتتاردىڭ قۇقىقتارى مەن بوستاندىقتارى، ەڭبەك قۇقىقتارى كونستيتۋسيالىق دەڭگەيدە بەكىتىلەتىنىن العا تارتتى.
قالامىزدا ىرگەلى نىسانداردىڭ بوي كوتەرۋى پرەزيدەنتتىڭ كاسىپكەرلىكتى قولداۋ ساياساتىنىڭ تىكەلەي جەمىسى دەپ ايتا الامىن. ءار ادامنىڭ قۇقىعى مەن بوستاندىقتارى مەملەكەتتىڭ باستى باسىمدىعى رەتىندە بەكىتىلىپ وتىر. ءار ادام ساپالى ەڭبەكپەن، ءوزى قالاعان كاسىپ تۇرىمەن اينالىسۋعا قۇقىلى. ەلدىك مۇددە مەن جارقىن بولاشاق ءۇشىن بارشا اقتوبەلىكتى جاڭا كونستيتۋسيانى قولداۋعا شاقىرامىن! ەلىمىز امان، كاسىبىمىز بەرەكەلى بولسىن!»، — دەدى اسلان قايىرعالييەۆ.
ايتا كەتەيىك، رەسپۋبليكالىق رەفەرەندۋم 15 ناۋرىزدا وتەدى.
