الەۋمەتتىك جەلىدە رەزونانس تۋدىرىپ جۇرگەن تاناگوز تولقىن قىزى تاعى ءبىر وتكىر جازباسىن جاريالاپ، قوعامداعى قۇندىلىقتار، ادىلەتسىزدىك جانە ۇلتتىق سانا ماسەلەسىن كوتەردى، دەپ حابارلايدى Dala News.
اۆتور جازباسىن «ءبىز نەگە باقىتسىز ۇلتپىز؟» دەگەن سۇراقپەن باستاپ، ەلدەگى مورالدىق داعدارىسقا نازار اۋدارادى.
«وكىنىشكە قاراي، بىزدە ساتىلمايتىن ادام جوق. ءبارىنىڭ موينىندا باعاسى جازىلعان بيركا تۇر. بىرەۋىنىڭ قۇنى – الىپ جۇرگەن جالاقىسى، بىرەۋىنىڭ قۇنى – بەس كۇندىك كرەسلوسى، بىرەۋىنىڭ قۇنى – كاسىبى، بىرەۋىنىڭ قۇنى – تەندەر»، – دەپ جازادى ول.
ونىڭ پىكىرىنشە، قوعامدا ار-ۇيات پەن ءوزىن-وزى قۇرمەتتەۋ السىرەگەن، ال وزگەرىس جاساۋعا دەگەن دايىندىق جوق.
«وزگەرىس سەن ولۋگە دايىن بولعاندا كەلەدى. ءبىراق ەشكىم ولگىسى كەلمەيدى. ياعني وزگەرىس ەشقاشان كەلمەيدى دەگەن ءسوز»، – دەيدى اۆتور.
سونداي-اق ول تاريحي تۇلعالاردى مىسالعا كەلتىرىپ، وتكەن ۇرپاقتىڭ كۇرەسى مەن قازىرگى قوعامنىڭ ايىرماشىلىعىن كورسەتەدى. اتاپ ايتقاندا، ءاليحان بوكەيحان، احمەت بايتۇرسىن ۇلى سىندى قايراتكەرلەردىڭ قۇرباندىعى ەسكە الىنادى.
اۆتور ماحاتما گانديدىڭ ءومىر جولىنا توقتالىپ، ونىڭ زورلىقسىز قارسىلىق فيلوسوفياسىن ەرەكشە اتاپ وتەدى. گانديدىڭ «ساتياگراحا» قاعيداتى – اقيقات پەن ادىلەت ءۇشىن بەيبىت كۇرەس جۇرگىزۋ – بۇگىنگى قوعامعا ۇلگى رەتىندە ۇسىنىلادى.
«ول الەمدى كۇشپەن ەمەس، ار-وجدان ارقىلى جەڭدى»، – دەپ جازادى اۆتور.
تاناگوز تولقىن قىزى قازىرگى قوعامدا دا سونداي تاباندىلىق پەن ءپرينسيپتىڭ جەتىسپەيتىنىن ايتادى. اسىرەسە، قازاق ءتىلىنىڭ ماسەلەسىنە ەرەكشە توقتالادى.
«ال سەنىڭ ۇلى جورىعىڭ – قازاق تىلىندە سويلەۋ. ماحابباتپەن سويلەۋ. تاباندى تۇردە سويلەۋ. ءپرينسيپتى تۇردە سويلەۋ. سول تىلدە سويلەۋگە يمەنبەي، نامىستانباي سويلەۋ»، – دەيدى ول.
اۆتوردىڭ پىكىرىنشە، ءار ادام وزگەرىستى وزىنەن باستاۋى كەرەك، ايتپەسە قوعامداعى جاعداي وزگەرمەيدى.
جەلى قولدانۋشىلارى بۇل جازباعا بەلسەندى پىكىر ءبىلدىرىپ، ءبىرى قولداۋ كورسەتسە، ەندى ءبىرى اۆتوردىڭ ويىمەن كەلىسپەيتىنىن جەتكىزگەن. دەگەنمەن جازبا قوعامداعى وزەكتى ماسەلەلەردى تاعى ءبىر مارتە كۇن تارتىبىنە شىعاردى.
