الماتىداعى ءۇش ادامنىڭ ءومىرىن قيعان جول اپاتىنا قاتىستى جاڭا مالىمەتتەر بەلگىلى بولدى. جۋرناليست ميحايل كوزاچكوۆتىڭ مالىمەتىنشە، Zeekr 9X كولىگىن 32 جاستاعى كولىك سالاسىندا جۇمىس ىستەيتىن كاسىپكەر باسقارعان، دەپ حابارلايدى Dalanews.kz.
ءجۋرناليستىڭ جازۋىنشا، قايعىلى وقيعا 21 ناۋرىز كۇنى الماتىداعى ءال-فارابي داڭعىلىندا بولعان. 009JET مەملەكەتتىك ءنومىرلى Zeekr كولىگى قارسى جولاققا شىعىپ كەتىپ، Mercedes اۆتوكولىگىمەن بەتپە-بەت سوقتىعىسقان.
سوقتىعىس سالدارىنان جەڭىل كولىكتە بولعان ءۇش ادام – 29 جاستاعى جۇرگىزۋشى جانە 20 جانە 22 جاستاعى ەكى جولاۋشى قىز قازا تاپتى. ال جول تالعامايتىن كولىكتى باسقارعان ەر ادام اۋىر جاراقات العان: ونىڭ قابىرعالارى، جامباس سۇيەگى جانە وڭ اياعى سىنعان.
ميحايل كوزاچكوۆتىڭ ايتۋىنشا، وعان وقيعاعا قاتىستى انىقتاما دا جىبەرىلگەن.
قۇجاتتاعى مالىمەتكە سايكەس، Zeekr كولىگىنىڭ جۇرگىزۋشىسى – الماتىنىڭ جوعارى بولىگىندە تۇراتىن 32 جاستاعى الەكساندر پاك. ونىڭ اتىنا ەكى كومپانيا تىركەلگەن: «گۋ حوزۋ الماتى» جانە «گلوبال پارتنەر» ج ش س. ول ەكى ۇيىمنىڭ دا قۇرىلتايشىسى.
ءبىرىنشى كومپانيا 2025 جىلى عانا تىركەلىپ، ءبىر جىل ىشىندە شامامەن 500 مىڭ تەڭگە سالىق تولەگەن. ال ەكىنشى كومپانيا – «گلوبال پارتنەر» – 2024 جىلدىڭ كۇزىنەن بەرى بيۋدجەتكە 50 ميلليون تەڭگەدەن استام سالىق اۋدارعان. بۇل كاسىپورىننىڭ اينالىمى ەداۋىر جوعارى ەكەنى بايقالادى. ساراپشىلاردىڭ ايتۋىنشا، Zeekr 9X اۆتوكولىگىنىڭ قۇنى شامامەن 100 مىڭ دوللار.
ءجۋرناليستىڭ پىكىرىنشە، كۇدىكتىنىڭ قارجىلىق مۇمكىندىگى ونىڭ جاۋاپكەرشىلىكتەن جالتارۋىنا نەگىز بولماۋى ءتيىس. ول كىنالى ادام مىندەتتى تۇردە سوت الدىندا جاۋاپ بەرىپ، جازا الادى دەپ ەسەپتەيدى. قولدانىستاعى زاڭناماعا سايكەس، قىلمىستىق كودەكستىڭ 345-بابىنىڭ 4-بولىگى بويىنشا 5 جىلدان 10 جىلعا دەيىن باس بوستاندىعىنان ايىرۋ جازاسى قاراستىرىلعان.
الايدا بۇل ىستە ماڭىزدى جايت بار. كۋاگەرلەردىڭ ايتۋىنشا، قايعىلى تۇندە Zeekr 9X باسقا كولىكپەن جارىسقان بولۋى مۇمكىن.
جۋرناليست مۇنداي جاعدايلاردا ءبىرقاتار ەلدەردە جازا الدەقايدا قاتاڭ ەكەنىن اتاپ ءوتتى. مىسالى، رەسەيدە وسىنداي قۇقىقبۇزۋشىلىق ءۇشىن 15 جىلعا دەيىن، اقش-تا 20 جىلدان استام، ال گەرمانيادا كەي جاعدايلاردا ءومىر بويىنا باس بوستاندىعىنان ايىرۋ جازاسى تاعايىندالادى.
ونىڭ پىكىرىنشە، قازاقستان زاڭناماسىندا دا وسىنداي جاعدايلارعا قاتىستى جاۋاپكەرشىلىكتى كۇشەيتۋ ماسەلەسىن قاراستىرۋ قاجەت.
