الماتى وبلىسىنىڭ ەڭبەكشىقازاق اۋدانىندا تاۋدا جوعالعان وتباسىن ىزدەۋ وپەراسياسى اياقتالدى، دەپ حابارلايدى Dalanews.kz تجم باسپا ءسوز قىزمەتىنە سىلتەمە جاساپ.
ەكى ەرەسەك ادام مەن ەكى بالا شونجى اۋىلىنا جاقىن دەمالىس ايماعىنان الماتىعا قاراي كولىكپەن شىققان، الايدا جولدا بايلانىسقا شىقپاي قويعان.
ءتۇنى بويى الماتى وبلىسىنىڭ قۇتقارۋشىلارى مەن «بارىس» جاساعى ۇيىنە ورالماعان وتباسىن ىزدەدى. ىزدەۋ جۇمىستارى كۇردەلى جاعدايدا ءوتتى: وتباسى باسشىسىنىڭ ۇيالى تەلەفونى ءوشىرۋلى بولعان، ال تاۋلى ايماقتا قار قالىڭ تۇسكەن.
تەلەفون بيللينگى ارقىلى باعىتتى انىقتاپ، بارتوعاي سۋ قويماسى ماڭىن تەكسەرۋ بارىسىندا قۇتقارۋشىلار 24 ناۋرىز كۇنى تاڭعى ساعات بەستە اسسى ءۇستىرتى اۋدانىنان جوعالعانداردى تاپتى. ولاردىڭ جول تالعامايتىن كولىگى قارعا باتىپ، قوزعالا الماي قالعان.
قۇتقارۋشىلار ەرەسەكتەر مەن بالالارعا مەديسينالىق كومەك قاجەت ەمەس ەكەنىنە كوز جەتكىزگەننەن كەيىن كولىكتى تازارتىلعان جول بولىگىنە دەيىن سۇيرەپ شىعاردى.تجم وكىلدەرى تاۋلى ايماقتارعا ساپار جوسپارلاعاندا اۋا رايى مەن جول جاعدايىن ەسكەرۋدى ەسكەرتەدى. مارشرۋتتىڭ قاۋىپسىزدىگىنە كوز جەتكىزبەي جولعا شىقپاۋ قاجەت.
