12 naýryzdan bastap Qazaqstanda Ákimshilik quqyq buzýshylyq týraly kodekske engizilgen ózgerister kúshine enedi. Túzetýler jol qozǵalysy erejelerin avtomatty túrde baqylaý aıasyn keńeıtýdi kózdeıdi, dep habarlaıdy Dalanews.kz.
Bul rette jańa shekteýler engizilmeıdi. Kameralar tek qoldanystaǵy talaptardy tirkeýdi kúsheıtedi.
Jańashyldyqqa sáıkes, beınebaqylaý júıeleri endi júrgizýshiniń rólde otyryp telefon qoldanǵanyn jáne qaýipsizdik beldigin taqpaǵanyn anyqtaı alady. Sonymen qatar júıe memlekettik derekqorlarmen baılanysý arqyly kólikte mindetti saqtandyrýdyń bar-joǵyn jáne tehnıkalyq baıqaýdyń merzimin de teksermek.
Budan bólek, keıbir ákimshilik baptar boıynsha (máselen, jolda keptelis týdyrý nemese jaryq shamdaryn talapqa saı qospaý) júıe ınspektordyń qatysýynsyz avtomatty túrde eskertý shyǵarýǵa múmkindik alady.
Al jaıaý júrginshilerge kamera arqyly aıyppul salynady degen aqparat shyndyqqa sáıkes kelmeıdi. İshki ister mınıstrligi mundaı málimetterdiń jalǵan ekenin resmı túrde málimdedi.
