Aqtóbe oblysyndaǵy iri sý qoımalary kóktemgi tasqyn kezeńine daıyndaldy, dep habarlaıdy Dala news.

«Qazsýshar» RMK Aqtóbe fılıaly Aqtóbe, Qarǵaly jáne Sazdy sý qoımalaryn kóktemgi sý tasqynyna daıyndaý boıynsha birqatar sharalardy júzege asyrǵan. Qazirgi ýaqytta óńirdegi úsh iri sý qoımasynda tasqyn sýlaryn qabyldaý jáne ótkizý úshin jetkilikti bos syıymdylyq qamtamasyz etilgen.

Atap aıtqanda, Aqtóbe sý qoımasynyń bos syıymdylyǵy – 58% nemese 142 mln tekshe metr, Qarǵaly sý qoımasynda – 69% nemese 192 mln tekshe metr, al Sazdy sý qoımasynda – 61% nemese 4,5 mln tekshe metrden astam.

Buǵan deıin barlyq nysandarda kópfaktorly tekserýler júrgizilip, nátıjesinde qaýipsizdik deklarasıalary ázirlengen. Sonymen qatar Aqtóbe jáne Sazdy sý qoımalarynda paıdalanýǵa berilgen sátten beri alǵash ret keshendi rekonstrýksıa jasalǵan.

Tótenshe jaǵdaılardyń aldyn alý maqsatynda úsh sý qoımasynda da oblystyq TJD ortalyq púltimen biriktirilgen jergilikti habarlaý júıeleri jumys isteıdi. Bul júıelerdiń baǵdarlamalyq qamtamasyz etýi jańartylyp, qosymsha radıostansıalar satyp alynǵan.

Aqtóbe fılıalynyń dırektory Rınat Shaýenovtiń aıtýynsha, tasqyn qaýpin azaıtýǵa baǵyttalǵan keshendi aldyn alý sharalary turaqty túrde júrgizilýde.

«Strategıalyq mańyzy bar nysandarda táýlik boıy kezekshilik uıymdastyrylǵan. Qaýipsizdik jáne kúzet rejımi kúsheıtildi. Barlyq sý sharýashylyǵy nysandarynda ınertti materıaldar daıyndaldy, janar-jaǵarmaı qory bar rezervtik dızeldi generatorlar qamtamasyz etilgen. Qazirgi ýaqytta sý qoımalary shtattyq rejımde jumys istep tur, jaǵdaı turaqty baqylaýda», – dedi ol.