Astanada İshki ister organdary jyl sońyna deıin 10 dron apparatyn jalǵa alýǵa 83,5 mln teńge bólgen, dep habarlaıdy Dala news.

Bir dronǵa shaqqanda shamamen 8,35 mln teńge shyǵady. Bul soma qoǵamda baǵanyń negizdiligine qatysty suraq týǵyzdy.

Satyp alý qujattaryna sáıkes, áńgime tehnıkany bir jylǵa jalǵa alý týraly bolyp otyr. Ashyq naryqtaǵy usynystardy salystyrǵanda, sıpattamalary uqsas DJI Matrice 4T modeliniń bir danasy Qazaqstanda shamamen 3,25 mln teńge turady. Iaǵnı satyp alý quny jalǵa alý baǵasynan aıtarlyqtaı tómen.

Árıne, jalǵa alý qyzmetine tek dronnyń ózi emes, operator qyzmeti, tehnıkalyq qyzmet kórsetý, saqtandyrý, baǵdarlamalyq qamtý jáne ózge de servıstik shyǵyndar kirýi múmkin. Alaıda soǵan qaramastan, bir birlikke bólingen qarjy satyp alý qunynan eki eseden astam joǵary bolýy sarapshylar arasynda kúmán týdyrady.

Bir qyzyǵy, alǵashqy jarıalanǵan konkýrsqa eshbir ótinim túspegen. Onyń sebebi belgisiz.

Satyp alý talaptarynyń ózi formaldy túrde zań talaptaryna saı kórinedi. Degenmen baǵa máselesi ashyq talqylaýdy qajet etedi.

Eger dron tehnıkasyn, servıstik qyzmet naryǵyn nemese memlekettik satyp alý salasyn jetik biletin mamandar bolsa, redaksıa pikir bildirýge daıyn.