Kásipker Gúlbaný Maıǵarına jeńildetilgen salyq rejımi boıynsha bızneske túsip otyrǵan júktemege qatysty pikir bildirdi, dep habarlaıdy Dalanews.kz.
Onyń aıtýynsha, qoldanystaǵy júıe boıynsha kásipkerler aldymen salyq tólep, sodan keıin ǵana taza paıdaǵa qol jetkizedi.
"Jeńildetilgen salyq rejıminde biz áýeli salyqty tóleımiz, sodan keıin ǵana taza tabysymyz qalady. Júıe dál osylaı jumys isteıdi. Búgin tabysymyz bar ma, joq pa - soǵan qaramastan, biz salyq tóleýge mindettimiz", - dedi ol.
Osyǵan baılanysty Maıǵarına ýákiletti organdardy Salyq kodeksindegi ózgeristerge muqıat qaraýǵa shaqyrdy.
"Sondyqtan barshaǵa úlken ótinish - Salyq kodeksinde bolyp jatqannyń bárin qaıta qarap shyǵý qajet", - dep atap ótti kásipker.
Sonymen qatar ol kásipkerlerdiń ózderine de úndeý jasady. Maıǵarınanyń aıtýynsha, qazirgi jaǵdaıda bıznesti emosıamen emes, naqty esep pen derekke súıenip júrgizý asa mańyzdy.
"Ekinshi úlken ótinishim - bizdiń kásipkerlerge, bıznes ókilderine. Shynymen otyryp, júıeli, durys bıznes qurý kerek. Negizgi, myqty sheshimderdi de, marketıńke, kadr qabyldaýǵa qatysty sheshimderdi de tek sıfrlarǵa súıenip qabyldaý qajet. Búgin emosıaǵa oryn joq. Áıtpese shaǵyn jáne orta bıznes úshin quldyraý sózsiz", - dedi ol.
Kásipkerdiń aıtýynsha, kadr qysqartý úrdisi qazirdiń ózinde baıqalyp otyr.
"Iá, búgin bizdiń jeliniń ózinde qyzmetker shamamen 25 paıyzǵa qysqardy. Bul tek bizdegi ǵana jaǵdaı emes. Men bulaı dep oılamaımyn, men muny naqty bilemin - dál osy salada jumys istep otyrǵan kásipkerlerdiń barlyǵynda derlik jaǵdaı osy", - dep túıindedi Gúlbaný Maıǵarına.
