Almaty qalasynda QR Parlamenti Májilisiniń depýtattary men Konstıtýsıalyq reforma jónindegi komısıa ókilderiniń qala Qoǵamdyq keńesiniń múshelerimen kezdesýi ótti, dep habarlaıdy Dala News.
Kezdesý barysynda qoǵamdyq talqylaýǵa shyǵarylǵan Konstıtýsıaǵa engiziletin túzetýler, sondaı-aq jańartylǵan memlekettik-quqyqtyq modeldi qalyptastyrýdaǵy azamattyq qoǵamnyń róli keńinen talqylandy. Qatysýshylar jańa Konstıtýsıa jobasyn qoldap, bul reformany eldiń saıası jańǵyrýyndaǵy negizgi kezeńderdiń biri retinde baǵalady.
Talqylaý kezinde bılik tarmaqtary arasyndaǵy ókilettikterdi qaıta bólý, Parlamenttiń rólin kúsheıtý, azamattardyń quqyqtary men bostandyqtaryna beriletin kepildikterdi keńeıtý, sondaı-aq memlekettik ınstıtýttardyń ashyqtyǵy men eseptiligin arttyrý máseleleri qozǵaldy.
Májilis depýtaty Ermurat Bápı konstıtýsıalyq reformalar aıasynda ashyq ári jaýapty qoǵamdyq dıalogtyń mańyzdylyǵyna toqtaldy. Onyń aıtýynsha, reformalardyń turaqty ári zańdy júzege asýy qoǵamnyń belsendi qatysýyna tikeleı baılanysty.
– Syndarly synǵa shekteý bolmaýy tıis. Ashyq talqylaý múmkindiginiń ózin qoǵamdyq qundylyq retinde baǵalaýymyz qajet. Tek dıalog arqyly ǵana qoǵam qabyldaıtyn jáne uzaq merzimde tıimdi jumys isteıtin sheshimderge qol jetkizýge bolady, – dedi Ermurat Bápı.
Sonymen qatar ol reformalar kezeńinde qoǵamdyq kelisimdi saqtaý jáne sezimtal taqyryptar tóńireginde alypsatarlyqqa jol bermeý qajettigin atap ótti.
Májilis depýtaty Erlan Saırov usynylyp otyrǵan konstıtýsıalyq ózgeristerdiń syrtqy syn-qaterler jaǵdaıynda eldiń turaqtylyǵy men aýmaqtyq tutastyǵyn qamtamasyz etýge baǵyttalǵanyn aıtty.
– Jańa Konstıtýsıa jobasynda jahandyq turaqsyzdyq jaǵdaıynda memlekettiń qaýipsizdigin, tutastyǵyn saqtaýǵa arnalǵan tetikter qarastyrylǵan, – dedi ol.
Kezdesý barysynda Konstıtýsıa preambýlasynyń mazmunyna da erekshe nazar aýdaryldy. Konstıtýsıalyq reforma jónindegi komısıa múshesi Únzıla Shapaq preambýla Ata zańnyń qundylyqtyq baǵytyn aıqyndaıtynyn atap ótti.
– Konstıtýsıa – memleket pen halyq arasyndaǵy qoǵamdyq kelisimniń kórinisi. Sondyqtan preambýlada ult birligi, memlekettiń ýnıtarlyq sıpaty men aýmaqtyq tutastyq naqty bekitilýi tıis, – dedi ol.
Qoǵamdyq keńes músheleri Qazaqstannyń saıası jáne áleýmettik damýdyń jańa kezeńine aıaq basqanyn atap ótip, osy ózgeristerdiń qazirgi zaman talaptaryna jaýap beretinin jetkizdi. Sondaı-aq jastardy talqylaý prosesine belsendi tartý men reformalardyń mánin qoǵamǵa túsinikti tilde jetkizýdiń mańyzy aıtyldy.
Kezdesý qorytyndysy boıynsha qatysýshylar usynylyp otyrǵan konstıtýsıalyq túzetýlerdi qoldap, mundaı dıalog alańdary sarapshylar men qoǵamdyq qaýymdastyqtyń pikirin eskerýge múmkindik beretinin atap ótti.
