Qazaqstanda jol erejesin jıi buzatyn júrgizýshilerge aıyppul jeńildigin alyp tastaý usynyldy. Mundaı bastamany senator Marat Qojaev qaıta kóterdi, dep habarlaıdy Dalanews.kz.
Qazirgi zańnamaǵa sáıkes, júrgizýshiler aıyppuldy jeti kún ishinde tólese, onyń 50 paıyzyn ǵana óteýge múmkindik bar. Senator bul jeńildikti bir jyl ishinde birtektes quqyqbuzýshylyqty 10 retten kóp jasaǵan azamattarǵa qoldanbaýdy usyndy.
Onyń aıtýynsha, mundaı júrgizýshiler 10-shy quqyqbuzýshylyqtan keıingi aıyppuldardy tolyq kólemde tóleýi tıis.
Senator bul bastamany alǵash ret 2025 jyly kótergenin eske saldy. Sol kezde bir júrgizýshiniń bir jyl ishinde kameralar arqyly 143 ret jol erejesin buzǵany tirkelip, ol 3 mıllıon teńgeden astam aıyppul tólegeni mysalǵa keltirilgen. Úkimet bul usynysty qarastyryp, qoldaǵan.
Depýtattyń aıtýynsha, tıisti ózgerister ákimshilik zańnamaǵa engiziletin kelesi túzetýler paketi aıasynda usynylýy múmkin.
