Aqmola oblysynyń ákimi Marat Ahmetjanov Býrabaı aýdanynyń Shýchınsk qalasynda bolǵan jaǵdaıdy jedel shtab múshelerimen talqylady, dep habarlaıdy Dalanews.kz.

"Azamattardyń qaýipsizdigi sózsiz basty basymdyq bolýǵa tıis. Osy baǵytta qosymsha uıymdastyrýshylyq jáne aldyn alý sharalary qabyldanady. Zardap shekken otbasylarǵa jan-jaqty qoldaý kórsetemiz", – dep atap ótti Marat Ahmetjanov.

Oblys ákimi zardap shekkender men qaza tapqandardyń otbasylaryna jan-jaqty kómek kórsetýdi, medısınalyq kómektiń ýaqytyly kórsetilýin jáne jedel járdem brıgadalarynyń táýlik boıy kezekshiligin uıymdastyrýdy, sondaı-aq, oqıǵa sebepterin jan-jaqty tergeýdi, kinálilerdi jaýapkershilikke tartýdy jáne qaýipsizdik talaptary saqtalýyn baqylaýdy kúsheıtýdi tapsyrdy.

Aıta keteıik, qaza tapqandardyń jaqyndaryna, ıaǵnı 6 otbasyǵa 2 mln teńge kóleminde birjolǵy tólem berilgen. Qaza tapqandardyń otbasylaryna dámhana ıesi qosymsha 2 mıllıon teńgeden tólegen. Ómirlik qıyn jaǵdaıǵa tap bolǵan 5 otbasynyń nesıeleri demeýshilik qarajat esebinen ótelmek. Sondaı-aq, zańnamaǵa sáıkes áleýmettik tólemder taǵaıyndalǵan.

Eske salaıyq, "Sentr plova" dámhanasynda gaz-aýa qospasy jarylyp, órt shyǵyp, saldarynan 28 adam zardap shekti, 5 adam oqıǵa ornynda qaza tapty, taǵy ekeýi aýrýhanaǵa jetkizilgen kezde kóz jumdy. 13 adam medısınalyq kómek alyp jatyr.