Shymkentte Boeing qatysýymen Ortalyq Azıadaǵy eń iri MRO SCAT avıasıalyq-tehnıkalyq ortalyǵynyń irgetasyna kapsýla salyndy, dep habarlaıdy Dalanews.kz.
Shymkent qalasynda MRO SCAT avıasıalyq-tehnıkalyq ortalyǵy qurylysy bastalýyna oraı kapsýla salý rásimi ótti. Keshen Ortalyq Azıadaǵy áýe kemelerine tehnıkalyq qyzmet kórsetý jáne jóndeý boıynsha eń iri ortalyqqa aınalmaq ári Qazaqstannyń avıasıa salasyndaǵy negizgi ınfraqurylym jobalarynyń biri sanalady.
Joba Memleket basshysynyń AQSH-qa jumys saparynyń qorytyndysy boıynsha halyqaralyq deńgeıde talqylandy. Boeing korporasıasynyń basshylyǵymen ótken kezdesýde Shymkentte áýe kemelerine tehnıkalyq qyzmet kórsetý jáne jóndeý ortalyǵyn qurý máselesi qarastyrylǵan bolatyn.
Saltanatty sharaǵa Shymkent qalasynyń ákimi Ǵabıt Syzdyqbekov, QR kólik vıse-mınıstri Talǵat Lastaev jáne Boeing kompanıasynyń komersıalyq satý jáne marketıń jónindegi vıse-prezıdenti Pol Rıgı qatysty.
Joba SCAT áýe kompanıasy bazasynda júzege asyrylady. Ortalyq Boeing 737 (Classic/NG/MAX), Boeing 757/767, sondaı-aq, bolashaqta Boeing 777 syndy keń fúzelájdy ushaqtarǵa tolyq sıkldi qyzmet kórsetýge baǵyttalady.
10 gektar aýmaqta jalpy aýdany 45 myń sharshy metrden asatyn zamanaýı ınjenerlik-tehnıkalyq keshen salynady. Onyń ishinde 6 gektardan asa aýmaqty qamtıtyn áýe kemelerine arnalǵan alań qarastyrylǵan.
Joba aıasynda keminde 15 joǵary tehnologıalyq nysan boı kóteredi. Olardyń qatarynda:
-
áýe kemelerine qyzmet kórsetetin kópfýnksıonaldy ortalyq;
-
avıasıalyq qozǵaltqyshtar, qosalqy kúshtik qondyrǵylar (VSÝ) jáne shası tirekterin jóndeý sehtary;
-
ıntererdi jańǵyrtý jáne beıimdeý ortalyǵy;
-
áýe kemelerin boıaý sehy;
-
elektron júıelerdi synaý jáne jóndeý zerthanasy;
-
qosalqy bólshekter men avıasıalyq komponentter qoımalary;
-
tolyq óndiristik sıkldi qamtamasyz etetin ınjenerlik ınfraqurylym.
MRO ortalyǵyn qurý Qazaqstannyń óndiristik jáne tehnologıalyq áleýetin nyǵaıtyp, sheteldik áýe kompanıalardyń ushaqtaryna qyzmet kórsetýge múmkindik beredi. Sondaı-aq, joǵary bilikti jumys oryndaryn ashýǵa jol ashady.
SCAT áýe kompanıasy jobany iske asyrýda QR Kólik mınıstrligi men Shymkent qalasy ákimdiginiń qoldaýyn erekshe atap ótti. Sonymen qatar, Boeing korporasıasynyń tehnıkalyq quzyretterdi damytýǵa jáne salalyq áriptestikti nyǵaıtýǵa qosqan úlesi aıtyldy.
"Kapsýla salý - Qazaqstan avıasıa salasynyń tehnologıalyq táýelsizdigin qamtamasyz etetin strategıalyq jobanyń bastaýy. Jańa ortalyq MRO naryǵyn sapaly, jańa deńgeıge shyǵaryp, Boeing ushaqtarynyń túrli tıpine qyzmet kórsetý múmkindigin keńeıtedi", - dedi SCAT áýe kompanıasynyń prezıdenti Vladımır Denısov.
