يسلامابادتا جۇما نامازى كەزىندە مەشىتتە جاسالعان تەراكت سالدارىنان كەمىندە 31 ادام قازا تاۋىپ، 170-كە جۋىق ادام جارالاندى، دەپ حابارلايدى Dala News.
پاكىستان استاناسىنداعى مەشىتتەردىڭ بىرىندە جانكەشتى لاڭكەس ءوزىن عيماراتتىڭ كىرەبەرىسىندە جارىپ جىبەرگەن. پوليسيا مالىمەتىنشە، كۇدىكتىنى مەشىتكە كىرەر الدىندا توقتاتۋعا تىرىسقان، سول ساتتە ول جارىلعىش قۇرىلعىنى ىسكە قوسقان. قۇرباندار سانى ارتۋى مۇمكىن، جارالانعانداردىڭ ءبىرقاتارىنىڭ جاعدايى اۋىر.
سوڭعى جىلدارى پاكىستاندا ەكسترەميستىك توپتاردىڭ شابۋىلدارى جيىلەپ، قاۋىپسىزدىك ماسەلەسى ۋشىعىپ وتىر.
وسى وقيعاعا بايلانىستى قازاقستان پرەزيدەنتى قاسىم-جومارت توقايەۆ پاكىستان باسشىلىعىنا كوڭىل ايتۋ جەدەلحاتىن جولدادى. مەملەكەت باسشىسى اسيف الي زارداري مەن پرەمەر-مينيستر شاحباز شاريف اتىنا جولداعان جەدەلحاتىندا يسلامابادتا بولعان تەرروريستىك اكتىنى قاتاڭ ايىپتاپ، قازا تاپقانداردىڭ وتباسىلارى مەن زارداپ شەككەندەرگە قولداۋ ءبىلدىردى.
پرەزيدەنت قازاقستاننىڭ پاكىستان حالقىمەن ىنتىماقتا ەكەنىن اتاپ ءوتىپ، پاكىستان استاناسى يسلامابادتا بولعان قايعىلى جاعدايعا بايلانىستى كوڭىل ايتتى.
