رامازان ايىنان كەيىن قازا ورازاسىن وتەۋ ءتارتىبى كوپشىلىك ءۇشىن وزەكتى، دەپ حابارلايدى Dala News.

قازا ورازا قاي كەستەگە قاراپ ۇستالادى؟
قازا ورازا كۇندەلىكتى ناماز ۋاقىتتارىنىڭ كەستەسىنە ساي ۇستالادى.
– تاڭ نامازىنىڭ كىرۋى – اۋىز بەكىتۋ ۋاقىتى؛
– اقشام نامازىنىڭ كىرۋى – اۋىز اشۋ ۋاقىتى.

قازا ورازاعا نيەت قالاي جاسالادى؟
ارنايى بەكىتىلگەن دۇعا جوق. نيەت جۇرەكپەن جاسالادى. ايتۋعا بولاتىن ۇلگى:
«اللا رازىلىعى ءۇشىن رامازاننان قالعان قازا ورازاسىنىڭ ءبىرىنشى (نەمەسە كەلەسى) كۇنىن وتەۋگە نيەت ەتتىم».

قازا ورازانى قاي ۋاقىتقا دەيىن وتەۋ كەرەك؟
حانافي ءمازھابىندا قازا ورازانى وتەۋدىڭ ناقتى مەرزىمى شەكتەلمەگەن.
كەلەسى رامازانعا دەيىن دە، ودان كەيىن دە وتەۋگە بولادى.
دەگەنمەن، كەشىكتىرمەي وتەۋ ابزال.

قازا ورازانى ۇزبەي ۇستاۋ مىندەت پە؟
جوق. ۇزبەي ۇستاۋ تالابى تەك 60 كۇندىك كاففارات ورازاسىنا قاتىستى.
قازا ورازانى ءبولىپ-بولىپ وتەۋگە بولادى.

قازا ورازانى ادەيى بۇزسا، 60 كۇن كاففارات كەرەك پە؟
جوق. ادەيى بۇزۋ – كۇنا، ءبىراق كاففارات مىندەتتەلمەيدى.
سول كۇندى قايتا ۇستاپ وتەيدى.

قازا ورازاسى بار ادام ءناپىل ورازا ۇستاي الا ما؟
حانافي ءمازھابى بويىنشا رۇقسات.
الايدا، الدىمەن قازا ورازانى وتەۋ – ماڭىزدىراق.

قازا ورازانى ايتتان كەيىن بىردەن ۇستاۋ شارت پا؟
ورازا ايتتىڭ ەكىنشى كۇنىنەن باستاپ قازا ورازا ۇستاۋعا بولادى.
ءۇش كۇن ايت بىتكەنىن كۇتۋدىڭ قاجەتى جوق. ايت مەرەكەسى تەك ءبىر كۇن.

قىسقاسى، قازا ورازا – وتەلۋى مىندەت عيبادات، ال ونى قالاي جانە قاشان وتەۋ ادامنىڭ ءوز مۇمكىندىگىنە قاراي جۇزەگە اسادى.