2025 جىلدىڭ شىلدەسىندە ەنگىزىلگەن دارىلىك زاتتاردى تاڭبالاۋ جۇيەسى ەلدە ءبىرقاتار زاڭبۇزۋشىلىقتى اشكەرەلەدى. بۇل تۋرالى دەنساۋلىق ساقتاۋ مينيسترلىگى مالىمدەدى، دەپ حابارلايدى Dalanews.kz.
اتاپ ايتقاندا، جۇيە تەگىن مەديسينالىق كومەكتىڭ كەپىلدەندىرىلگەن كولەمى (تمككك) اياسىندا حالىققا تەگىن تاراتىلۋى ءتيىس دارىلەردىڭ كوممەرسيالىق نارىقتا ساتىلعانىن، تاڭبالاۋ كودتارىنىڭ قايتا قولدانىلعانىن جانە جارامدىلىق مەرزىمى ءوتىپ كەتكەن پرەپاراتتاردىڭ ساۋداعا شىعارىلعانىن انىقتاعان.
تاۋارلاردى تاڭبالاۋ جانە قاداعالاۋ جونىندەگى ءبىرىڭعاي وپەراتوردىڭ مالىمەتىنشە، مەملەكەت قارجىسىنا ساتىپ الىنىپ، حالىققا تەگىن بەرىلۋى ءتيىس 15 مىڭنان استام دارى-دارمەك بىرلىگى ساتىلعانى تىركەلگەن. سونداي-اق 6،5 مىڭنان استام تاڭبالاۋ كودى قايتا پايدالانىلىپ، جالپى سانى 385 مىڭنان اسا زاڭبۇزۋشىلىق فاكتىسى انىقتالدى. بۇدان بولەك، جارامدىلىق مەرزىمى ءوتىپ كەتكەن 750-دەن استام ءدارى قاپتاماسىنىڭ ساتىلعانى بەلگىلى بولدى.
ۆەدومستۆونىڭ حابارلاۋىنشا، مينيستر ۆيسە-مينيسترلەر مەن قۇرىلىمدىق بولىمشەلەرگە ءدارى اينالىمىن تولىق تارتىپكە كەلتىرۋ ءۇشىن تاڭبالاۋ جانە قاداعالاۋ جۇيەسىنىڭ اناليتيكالىق پلاتفورماسىن كۇندەلىكتى جۇمىستا قولدانۋدى تاپسىردى. سونىمەن قاتار بيۋدجەت قاراجاتىنىڭ ءتيىمدى جۇمسالۋىن قامتاماسىز ەتۋ ءۇشىن دارىلەردىڭ ماقساتسىز پايدالانىلۋىن قاتاڭ باقىلاۋ مىندەتتەلدى.
