Oral qalasyndaǵy jylý elektr ortalyǵynda japondyq Hitachi kompanıasynyń gaz týrbınalyq qondyrǵysy kúrdeli jóndeýden keıin tolyq qýatynda jumysyn bastady, dep habarlaıdy Dala News.
Qýaty 28 MVt bolatyn gaz týrbınaly qondyrǵy budan 20 jyl buryn ornatylǵan. 2019 jyly josparly ınspeksıalyq tekseris júrgizilgenimen, jóndeý jumystary ártúrli sebeptermen keshiktirilgen. Másele oblys ákimi Narıman Tóreǵalıevtiń tikeleı aralasýymen sheshimin tapty.
2023 jyly aımaq basshysy bastaǵan Batys Qazaqstan oblysynyń delegasıasy Japonıaǵa baryp, týrbınany óndirýshi zaýyt ókilderimen kelissóz júrgizdi. Nátıjesinde qosalqy bólshekterdi daıyndaý jáne jetkizý boıynsha kelisimshart jasalyp, kúrdeli jóndeý jumystaryn atyraýlyq kompanıa júzege asyrdy.
Energetıkalyq ınfraqurylymdy jańǵyrtý aıasynda sońǵy eki jylda salaǵa 15,6 mlrd teńge bólingen. 2035 jylǵa deıingi kezeńge arnalǵan 32 jobadan turatyn Jol kartasy boıynsha sorǵy stansıalary men jańa qazandyqtar salý, sondaı-aq qalanyń negizgi jylý magıstraldaryn jańartý jumystary júrgizilip jatyr. Qazirgi ýaqytta №6 jáne №7 jylý jelilerin jańǵyrtý jobalary iske asýda.
Saltanatty iske qosý rásiminde oblys ákimi atqarylyp jatqan sharalar óńirdiń energetıkalyq qaýipsizdigin nyǵaıtyp, komýnaldyq sektordyń senimdiligin arttyratynyn aıtty. Sonymen qatar, jylý jáne sýmen jabdyqtaý júıelerin sıfrlandyrý máselesine de toqtaldy.
Aıtýynsha, bolashaqta qalanyń komýnaldyq ınfraqurylymy tolyq avtomattandyrylyp, ortalyqtandyrylǵan basqarý júıesi engiziledi. Bul aqaýlardy jedel anyqtaýǵa jáne qyzmetterdiń úzdiksiz jumysyn qamtamasyz etýge múmkindik beredi.
