اقتوبە وبلىسىنداعى ءىرى سۋ قويمالارى كوكتەمگى تاسقىن كەزەڭىنە دايىندالدى، دەپ حابارلايدى Dala news.

«قازسۋشار» رمك اقتوبە فيليالى اقتوبە، قارعالى جانە سازدى سۋ قويمالارىن كوكتەمگى سۋ تاسقىنىنا دايىنداۋ بويىنشا ءبىرقاتار شارالاردى جۇزەگە اسىرعان. قازىرگى ۋاقىتتا وڭىردەگى ءۇش ءىرى سۋ قويماسىندا تاسقىن سۋلارىن قابىلداۋ جانە وتكىزۋ ءۇشىن جەتكىلىكتى بوس سىيىمدىلىق قامتاماسىز ەتىلگەن.

اتاپ ايتقاندا، اقتوبە سۋ قويماسىنىڭ بوس سىيىمدىلىعى – 58% نەمەسە 142 ملن تەكشە مەتر، قارعالى سۋ قويماسىندا – 69% نەمەسە 192 ملن تەكشە مەتر، ال سازدى سۋ قويماسىندا – 61% نەمەسە 4،5 ملن تەكشە مەتردەن استام.

بۇعان دەيىن بارلىق نىسانداردا كوپفاكتورلى تەكسەرۋلەر جۇرگىزىلىپ، ناتيجەسىندە قاۋىپسىزدىك دەكلاراسيالارى ازىرلەنگەن. سونىمەن قاتار اقتوبە جانە سازدى سۋ قويمالارىندا پايدالانۋعا بەرىلگەن ساتتەن بەرى العاش رەت كەشەندى رەكونسترۋكسيا جاسالعان.

توتەنشە جاعدايلاردىڭ الدىن الۋ ماقساتىندا ءۇش سۋ قويماسىندا دا وبلىستىق تجد ورتالىق پۋلتىمەن بىرىكتىرىلگەن جەرگىلىكتى حابارلاۋ جۇيەلەرى جۇمىس ىستەيدى. بۇل جۇيەلەردىڭ باعدارلامالىق قامتاماسىز ەتۋى جاڭارتىلىپ، قوسىمشا راديوستانسيالار ساتىپ الىنعان.

اقتوبە فيليالىنىڭ ديرەكتورى رينات شاۋەنوۆتىڭ ايتۋىنشا، تاسقىن ءقاۋپىن ازايتۋعا باعىتتالعان كەشەندى الدىن الۋ شارالارى تۇراقتى تۇردە جۇرگىزىلۋدە.

«ستراتەگيالىق ماڭىزى بار نىسانداردا تاۋلىك بويى كەزەكشىلىك ۇيىمداستىرىلعان. قاۋىپسىزدىك جانە كۇزەت رەجيمى كۇشەيتىلدى. بارلىق سۋ شارۋاشىلىعى نىساندارىندا ينەرتتى ماتەريالدار دايىندالدى، جانار-جاعارماي قورى بار رەزەرۆتىك ديزەلدى گەنەراتورلار قامتاماسىز ەتىلگەن. قازىرگى ۋاقىتتا سۋ قويمالارى شتاتتىق رەجيمدە جۇمىس ىستەپ تۇر، جاعداي تۇراقتى باقىلاۋدا»، – دەدى ول.