مادەنيەت جانە اقپارات ۆيسە-مينيسترى ەۆگەنيي كوچەتوۆ قازاقستاندا شەتەلدىك ارتىستەردىڭ كونسەرتتەرى قانداي جاعدايدا توقتاتىلۋى نەمەسە تىيىم سالىنۋى مۇمكىن ەكەنىن ءتۇسىندىردى، دەپ حابارلايدى Dalanews.kz.
ونىڭ ايتۋىنشا، بۇل سەنزۋرا دا ەمەس، «قارا تىزىمدەر» دە ەمەس. قازاقستان شەتەلدىك ورىنداۋشىلار ءۇشىن اشىق ەل بولىپ قالا بەرەدى، ءسوز بوستاندىعى ساقتالادى. الايدا كونسەرت ۇيىمداستىرۋ ءتارتىبى وزگەرەدى.
بۇعان دەيىن ارتىستەر نەمەسە ولاردىڭ كوماندالارى الدىمەن الاڭ تاۋىپ، بيلەت ساتۋدى باستاپ، تەك سودان كەيىن عانا قۇجاتتاردى راسىمدەۋگە كىرىسەتىن. سونىڭ سالدارىنان اكىمدىكتەر مەن ءتيىستى ۆەدومستۆولار كونسەرتتەر تۋرالى كوبىنە كەيىن ءبىلىپ جاتاتىن، بيلەتتەر ساتىلىپ كەتكەن سوڭ، الەۋمەتتىك جەلىلەردەن كورەتىن. كوچەتوۆ مۇنداي تاجىريبەنى دۇرىس ەمەس دەپ اتادى.
ەندى جاڭا ءتارتىپ ەنگىزىلەدى. الدىمەن رەسمي كەلىسىمشارت جاسالادى، كەيىن جەرگىلىكتى بيلىكپەن كەلىسۋ جۇرگىزىلەدى، تەك سودان سوڭ عانا بيلەت ساتىلىمى باستالادى. وسىلايشا مەملەكەتتىك ورگاندار كىم كەلەتىنىن، قانداي باعدارلامامەن جانە قانداي شارتتارمەن ونەر كورسەتەتىنىن الدىن الا بىلەتىن بولادى.
كەلىسىمشارتتاردا ءارتىستىڭ مىندەتتەمەلەرى ناقتى كورسەتىلەدى. ەڭ باستىسى، كونسەرت بارىسىندا ەل زاڭدارىن بۇزاتىن كونتەنت بولماۋى ءتيىس: ەسىرتكىنى ناسيحاتتاۋ، پورنوگرافيا، مەملەكەتتىك قۇرىلىمعا قارسى ۇندەۋلەر نەمەسە وزگە دە تىيىم سالىنعان تاقىرىپتار.
ەگەر رەپەرتۋاردا داۋلى شىعارمالار بولسا، ارتىسكە ولاردى قازاقستان ساحناسىندا ورىنداماۋ جونىندە ۇسىنىس بەرىلەدى. وسى تالاپتار ساقتالعان جاعدايدا كونسەرت وتكىزۋگە ەشقانداي كەدەرگى بولمايدى.
