Тамақтан кейін ағзада күрделі ас қорыту процесі басталады. Асқазан-ішек жолы тағамды қарапайым заттарға дейін ыдыратып, оны сіңіруге дайындайды. Бірақ осы кезде жасалатын кейбір күнделікті әдеттер ас қорытуға кедергі келтіріп, ауырлық, жүрек айну секілді жайсыздықтарға әкелуі мүмкін. Тамақтан кейін қандай әрекеттер жасамаған жөн? Толығырақ Dalanews.kz сайтында.

Тамақтан соң жатып демалу

Көпшілік тойып тамақ ішкеннен кейін жатып демалғысы келеді. Алайда бұл асқазан қышқылының өңешке кері өтуіне (рефлюкс) себеп болуы мүмкін. Соның салдарынан қыжыл, жайсыздық пайда болады. Дәрігерлер тамақтан кейін кемінде 1–2 сағат жатпауға кеңес береді.

Темекі шегу

Темекі ас қорыту жүйесіне кері әсер етеді. Никотин асқазанның жұмысын баяулатып, гастрит пен ойық жараның пайда болу қаупін арттырады. Егер бұл әдеттен бірден бас тарту қиын болса, кем дегенде 30–45 минуттан кейін ғана шеккен дұрыс.

Спортпен айналысу

Тамақтан кейін бірден жаттығу жасау іштің түйілуіне, ауырлыққа және рефлюкске әкелуі мүмкін. Себебі қан бұл кезде асқазаннан бұлшықеттерге ауысады. Белсенді жаттығуға дейін 1–2 сағат күткен жөн.

Моншаға немесе ыстық душқа түсу

Жоғары температура қан айналымын өзгертеді: қан теріге көбірек барып, ас қорыту баяулайды. Бұл бас айналуға да себеп болуы мүмкін. Тамақтан кейін біраз уақыт өткен соң ғана моншаға барған дұрыс.

Суық сусын ішу

Суық су асқазандағы қан тамырларын тарылтып, ас қорыту процесін баяулатуы мүмкін. Сонымен қатар ыстық тағамнан кейін суық ішу тіс эмаліне зиян. Бөлме температурасындағы суды таңдаған дұрыс.

Десерт жеу

Тәтті тағамдар тез қорытылады. Ал ауыр тамақтан кейін жесе, іш кебуі мен жайсыздық туғызуы мүмкін. Десертті бөлек уақытқа қалдырған жөн.

Тағы қандай әдеттер зиян?

• Кофені шамадан тыс ішу – асқазан қышқылын арттырады

• Артық тамақтану – асқазанға күш түсіреді

• Стресс жағдайында тамақтану – ас қорыту процесін бұзады

Тамақтан кейінгі қарапайым әдеттер денсаулыққа тікелей әсер етеді. Дұрыс режимді сақтап, зиянды әрекеттерден бас тарту – ас қорытуды жақсартып, көптеген мәселелердің алдын алуға көмектеседі.