Májiliste Konstıtýsıalyq reformany talqylaý barysynda Respublica fraksıasynyń depýtaty Aıtýar Qoshmambetov jańa Konstıtýsıa jobasyn eldegi saıası júıeni jańartýǵa baǵyttalǵan túbegeıli sheshim dep atady, dep habarlaıdy Dala News.
Depýtattyń aıtýynsha, bul reforma bıliktiń ishki túzetýi emes, qoǵamnyń uzaq jyldar boıy jınalǵan suranysynyń nátıjesi. 2022 jylǵy referendým burynǵy 30 jyl boıy qalyptasqan saıası modeldiń irgesin shaıqap, ózgeristerge jol ashty.
Aıtýar Qoshmambetov jeke menshik quqyǵyn kúsheıtý ekonomıkalyq ǵana emes, saıası senim máselesi ekenin atap ótti. Onyń pikirinshe, azamat pen bıznes úshin memlekettiń basty mindeti – erejeniń ózgermeıtinine kepil berý.
Jańa Konstıtýsıa osy turǵyda quqyqtyq aıqyndyqty kúsheıtip, memleket pen jeke sektor arasyndaǵy shekarany naqtylaýǵa tıis.
Depýtat aýmaqtardy damytýdyń arnaıy quqyqtyq rejımderin engizý bastamasyn Qazaqstannyń jahandyq básekege beıimdelýiniń bir tetigi retinde baǵalady. Astana halyqaralyq qarjy ortalyǵynyń tájirıbesi erekshe quqyqtyq rejımniń ınvestısıa tartýda tıimdi ekenin dáleldedi.
Alataý sıtı – tehnologıa, sıfrlyq aktıvter men ınovasıalyq salalarǵa arnalǵan uzaqmerzimdi platforma. Qoshmambetovtiń aıtýynsha, mundaı jobalar ýaqytsha zańdarmen emes, Konstıtýsıalyq deńgeıde qorǵalýy qajet.
Aıtýar Qoshmambetov halyqaralyq sharttardyń ulttyq zańnama arqyly iske asyrylýyn memlekettiń quqyqtyq kemeldenýiniń belgisi dep atady. Qazaqstan halyqaralyq mindettemelerden bas tartpaıdy, biraq olardy júzege asyrý tetigin ózi aıqyndaıdy. Bul ózgeris memlekettiń egemendigin álsiretpeıdi, kerisinshe jaýapkershiligin kúsheıtedi.
Depýtat derbes derekter men jeke ómirdi qorǵaý Konstıtýsıalyq deńgeıde bekitilýi tıis ekenin aıtty. Kıberqylmystardan kelgen mıllıardtaǵan shyǵyn bul máseleniń tek tehnıkalyq emes, saıası sıpat alǵanyn kórsetedi.
Aıtýar Qoshmambetovtiń aıtýynsha, jańa Konstıtýsıanyń túpki maqsaty – ınstıtýttardy nyǵaıtý, senim qalyptastyrý jáne eldiń uzaqmerzimdi damýyna saıası negiz qalaý. Respublica fraksıasy bul reformany qoldaý arqyly jaýapty ári zamanaýı memleket qurý jolyn tańdady.
